Mystisk stein i Odda avslører dato for ny Netflix-serie
I løpet av natt til onsdag dukka det opp ein stor mystisk stein med runer og Netflix-logo nede ved sjøkanten i Odda i Hordaland.
Denne artikkelen er eldre enn 1 år gamal. Det betyr at noko av informasjonen kan vere utdatert.
Over Netflix-logoen står det ein beskjed i runeskrift om kva tid den nye serien Ragnarok har premiere: «Ragnarok kjem 31. januar 2020».
Netflix stadfestar til Hardanger Folkeblad at det er dei som har sett opp steinen.
– Etter all velviljen som er vist frå lokalsamfunnet under innspelinga ville me at dette skulle vera den første staden i verda som fekk vita når serien kjem, får lokalavisa stadfesta frå ein representant frå Netflix si presseteneste i Noreg.
Klimaendringar
Ragnarok er den første norskspråklege storsatsinga til Netflix, og går føre seg i den fiktive småbyen «Edda». Serien blir skildra som ei moderne oppveksthistorie med røter i norrøn mytologi.
På Netflix sine eigne nettsider blir serien omtalt som ein action- og eventyrserie, og klimaendringar vil truleg spela ei rolle i serien.
– Varme vintrar og valdsame regnbyger fører ei lita norsk bygd nærmare eit nytt Ragnarok – med mindre nokon grip inn i tide, står det i skildringa av serien.
- Er du budd på Ragnarok? Test dine kunnskapar om norrøn mytologi her!
SKAM-skodespelarar
Blant skodespelarane er David Stakston og Herman Tømmeraas frå Skam. Både Henriette Steenstrup, Odd-Magnus Williamson og Bjørn Sundquist har vore i Odda i samband med serien, ifølgje Hardanger Folkeblad.
Både i vår og i sommar har serien blitt spelt inn på offentlege stader i Odda, på ungdomsskulen og i private heimar.
I vår var Framtida.no i Odda og snakka med fleire tiandeklassingar som hadde fått seg jobb som statistar i serien. Dei kunne fortelja at deler av innspelinga var krevjande.
Møt skodespelarane frå Netflix-satsinga Ragnarok. Frå venstre: Herman Tømmeraas, Ylva Bjørkaas Thedin,Theresa Frostad Eggesbø, Emma Bones, Jonas Strand Gravli and David Stakston. Foto: Pressefoto.
