Det er berre éin ting norske bønder «hatar» meir enn EU

Norske husdyrprodusentar har rett nok lite tillit også til EU, men tilliten til dyrevernorganisasjonar er endå lågare, ifølgje ei spørjeundersøking som er gjennomført av forskingsprosjektet Aniwel blant norske husdyrprodusentar.

Det skriv Nationen.

Tillit til Mattilsynet lokalt

– Ein tenker nok at dette er nokon som jobbar imot det ein sjølv arbeider for. Elles er det viktig å merke seg at husdyrprodusentane har høg tillit til Mattilsynet, og at tilliten er høgare til Mattilsynet lokalt enn sentralt, seier Oddveig Storstad, som er forskar ved Norsk institutt for bioøkonomi (Nibio) og ein av forskarane i Aniwel-prosjektet.

Til saman 1.546 husdyrprodusentar frå heile Noreg har svart på undersøkinga.

Svara konkluderer med at det er helsevesenet som nyt størst tillit, følgd av politiet, Norges Bondelag, Bonde og Småbrukarlaget og Mattilsynet lokalt.

• Les også innlegget: «Griseindustriens hemmelegheiter er ute i offentlegheita»

Svinebråk, pelsdyr og rovdyr

Dei tre nedste plassane på lista som er attgitt i Nationen, er media, EU og dyrevernsorganisasjonar (sist).

Undersøkinga er tatt opp i ein periode med mykje uro, like etter at Mattilsynet gjennomførte ein omfattande tilsynskampanje for slaktegris i Rogaland også etter mykje debatt om pelsdyrnæringa og om beite og rovdyr.

• Les også innlegget: «Sjølv om grisane i fjøset mitt har det bra, er det ingen tvil om at dei kunne hatt det betre»

Illustrasjonsfotoet eg har vald er den sjukaste grisen av dei 120 grisane eg har i fjøset nett no. Den har, truleg på grunn av eit halesår, fått leddbetennelse i venstre framfot, og er halt. Den er teken ut av bingen, og går no i ein sjukebinge med ekstra plass og ro for seg sjølv. I samråd med veterinær går den på ein antibiotikakur, og eg har trua på at den skal verte heilt frisk og rask att. Slik skal det vere, og slik ER det i dei aller fleste grisefjøs, skriv Jørund Kvaale Hansen. Foto: Privat