Glattkøyring og langkøyring vert gyldig fråvær

Frå 1. august 2019 vert glattkøyring på bane, langkøyring og sikkerheitskurs på veg i variert trafikkmiljø gyldig fråvær for elevar i den vidaregåande skulen.

Grunnen til endringane er at desse obligatoriske timane er vanskelegast å kombinera med skulekvardagen, heiter det i ei pressemelding frå Kunnskapsdepartementet.

• Les også: Førarkortet blir digitalt – men berre i Noreg

Framleis fråvær

– Elevane må framleis rekne med å bruka fritimar, feriar og andre tidspunkt utanom skuletid til trafikkopplæring, sjølv om delar av trafikkopplæringa no kan unntas fråværsgrensa, seier kunnskapsminister Jan Tore Sanner i ei pressemeldinga.

Han gler seg over at fråværet har gått ned etter at den omstridde fråværsgrensa vart innført, men ser behovet for å leggja betre til rette for elevar som skal ta førarkort.

• Les også: Trafikkskulane vil at alle skal køyre opp med automatgir

Vil ha gyldig fråvær for oppkøyring

Då forslaget var ute på høyring fekk regjeringa innspel om at også den praktiske førarprøven – altså oppkøyringa, bør bli gyldig fråvær.

Dette forslaget vil regjeringa vurdera i samband med evalueringa av fråværsgrensa i 2020.

Administrerande direktør i Autoriserte Trafikkskolers Landsforbund, Torgeir Abusdal, stiller seg uforståande til at at den praktiske førarprøven ikkje er gyldig fråvær.

– Endringane som no kjem er velkomne, men løyser berre litt av problemet og viser at myndigheitene ikkje skjønar at førarkort er samfunnsnyttig, og god trafikkopplæring er viktig for å hindre drepne og skadde i trafikken, seier Abusdal i ei pressemelding.