Cruiseskip stempla som utsleppsversting i ny rapport
Noreg er ifølgje ein rapport eitt av dei landa som er verst ramma av forureining frå cruiseskip.
Denne artikkelen er eldre enn 1 år gamal. Det betyr at noko av informasjonen kan vere utdatert.
Berre Spania, Italia og Hellas og Frankrike har meir utslepp frå cruiseskip enn Noreg.
Her i landet er utsleppa av helseskadeleg svoveldioksid frå cruisetrafikken fem gonger så høge som frå all annan skipstrafikk langs norskekysten. Det viser ein studie frå den europeiske organisasjonen Transport & Environment (T & E).
– Luksuriøse cruiseskip er flytande byar som blir drive av noko av det skitnaste drivstoffet som finst, seier shippingansvarleg Faig Abbasov i T & E ein kommentar til rapporten.
Rekordhøge utslepp av nitrogenoksid
Dette er første gongen det kjem tal på kor mykje svovel cruisetrafikken slepper ut i norske farvatn. Ifølgje rapporten frå T & E er cruiseskipa blant dei aller verste forureinarane, ikkje berre av svovel. Også utsleppa av nitrogenoksid (NOx) er rekordhøge.
Organisasjonen viser til at 110 cruiseskip som trafikkerte norske farvatn i 2017 slapp ut 5.100 tonn SO2. Utsleppa frå resten av innanriksflåten var på om lag 1.000 tonn i året, viser tal frå Statistisk sentralbyrå (SSB), skriv Teknisk Ukeblad.
NOx-utslepp frå bilar i Noreg er på 13.000 tonn, medan utsleppa frå cruisetrafikken er på nesten 19.000 tonn. NOx kan også gi helseplager som astma.
Sidan cruiseskipa seglar nær land, blir konsekvensane større.
– Nesten alle desse utsleppa fell ned på fastlandet, peikar Abbasov på.
- Les også: Zero: Må stille krav til cruisenæringa
Eitt cruiseskip er bøtelagt
Morten Simonsen i Vestlandsforsking har forska på korleis cruiseturismen påverkar miljø og økonomi. Han meiner tala frå T & E ikkje verkar urimelege, men understrekar at det er stor uvisse knytt til slike utrekningar.
– Skipa bruker ulike drivstoff i ulike farvatn, og så lenge ein ikkje veit kva slags drivstoff kvart enkelt cruiseskip brukar til kvar tid, er det vanskelege berekningar å gjera, seier Simonsen til Teknisk Ukeblad.
I verdsarvfjordane på Vestlandet tredde nye miljøkrav i kraft frå 1 mars. Den nye forskrifta krev at svovelinnhaldet i drivstoffet maksimalt skal vera på 0,10 vektprosent.
Eitt cruiseskip er bøtelagt for brot på miljøregelverket, og Sjøfartsdirektoratet har varsla tett oppfølging og kontroll gjennom sommaren.
Les også: Norske byar og fjordar einige om miljøkrav til cruisenæringa
