Dobbelt så mange som venta streika for klimaet
I førekant var det håp om at kring 15 000 elevar skulle la skulesekken stå heime fredag, og streike for klimaet. Førebelse tal viser at det dobbelte møtte opp.
Denne artikkelen er eldre enn 1 år gamal. Det betyr at noko av informasjonen kan vere utdatert.
– Dette viser det enorme engasjementet norsk ungdom har for framtida si. Over 36 000 har teke til gatene for å krevje klimahandling. No må regjeringa lytte! seier Gaute Eiterjord, leiar i Natur og Ungdom i ei pressemelding.
Sjå biletsaka om dei mange parolane som var i sving under streiken.
Dobbelt så mange som venta
I førekant av streiken rekna miljøorganisasjonen med at kring 15 000 elevar over heile landet kom til å streike. Førebelse tal syner at det var meir enn dobbelt så mange som møtte opp.
Her fortel tre av streikarane til Framtida.no kvifor dei møtte opp:
Det vart fredag mana til storstreik i over 70 byar og bygder i Noreg, frå Longyearbyen til Mandal. Ifølgje miljøorganisasjonen møtte over 20 000 born og unge i Oslo opp framfor Stortinget fredag. Samstundes streika over 4000 i Trondheim, over 1000 i Tromsø, og over 1300 i Hamar.
– I dag har vi vist at den yngre generasjonen synest ikkje noko om regjeringa sin klimapolitikk. Om vi skal ha noko som helst håp om å nå klimamåla må vi radikalt omstille samfunnet vårt. No må politikarane høyre etter! seier Eiterjord i pressemeldinga.
Klima- og miljøminister Ola Elvestuen møtte elevane som fredag streika frå skulen for å sikre at politikarane høyrer klimakrava deira. Foto: Bente Kjøllesdal
