Greta (15) under klimatoppmøtet: – Forandringa kjem, anten de likar det eller ikkje
Denne artikkelen er eldre enn 1 år gamal. Det betyr at noko av informasjonen kan vere utdatert.
– Eg har lært at du er aldri for liten til å gjera ein forskjell. Viss nokre få barn kan få overskrifter verda over ved å berre ikkje gå på skulen, tenk berre på kva me kunne gjort saman om me verkeleg ville, sa Greta Thunberg då ho talte til verdas leiarar under COP24 – FNs klimatoppmøte i Katowice i Polen.
Den svenske 15-åringen har skapt overskrifter verda over med sin skulestreik for å få svenske politikarar til å ta klimatrugselen på alvor.
Les innlegget: Kan vi håpe på eit ungdomsopprør?
Global klimastreik
Etter to veker på klimatoppmøtet er ikkje Greta Thunberg imponert over politikarane sin vilje til å forplikta seg til klimatiltak.
– Utsleppa våre aukar framleis, samstundes som vitskapen tydeleg har fortalt oss at me må han handle no for å halde planeten under 1,5 grader oppvarming, seier Thunberg i ein video på Twitter.
15-åringen oppmodar difor folk over heile verda til å møte opp framfor parlamentet sitt 14. desember og streika for klimaet.
Climate leaders don’t just talk.
They act.
Join us!!
Global climate strike 14 December.
Spread the word!! #FridaysForFuture #ClimateStrike #ClimateChallenge #ClimateLeader #cop24 #schoolstrike4climate pic.twitter.com/f5A2WogQxr— Greta Thunberg (@GretaThunberg) 12. desember 2018
Klimahelten Greta
Under klimatoppmøtet har den svenske skuleeleven møtt FNs generalsekretær António Guterres og vorte utropt til klimahelt. Thunberg er tydeleg i sin tale og oppmodar unge til å bli sinte og halde dei vaksne ansvarlege for kaoset dei har skapt:
Greta Thunberg surprised everyone at #COP24 when she explained why she started skipping school to strike at the Swedish Parliament. This young #climatechange activist speaks frankly – indeed, you’re never too small to make a difference! #climateaction https://t.co/dSBIxuSjdv pic.twitter.com/CsWvqFuoze
— UN Climate Change (@UNFCCC) 10. desember 2018
Under klimatoppmøtet fekk Thunberg eitt minutts taletid der ho snakka på vegner av den internasjonale klimakampanjen Climate Justice Now!
15-åringen meiner det er på tide å snakka tydeleg, same kor ubehageleg det måtte vera og la ingenting imellom i talen sin.
– De er ikkje modne nok til å seie det som det er, sjølv den byrda overlet de til oss born. Eg bryr meg ikkje om å vera populær, eg bryr meg om klimarettferd og den levande planeten. Vår sivilasjon vert ofra for at ei veldig lita gruppe folk skal kunne fortsetja å tene enorme pengesummar, sa ho frå talarstolen.
Les også: Skuleelevar i Australia streikar for klimaet
Snakkar når det er nødvendig
Den svenske 15-åringen har vorte omtalt i medier verda over og har halde eit TED-føredrag om engasjementet som starta som 8-åring.
I ein alder av 11 år gjekk ho inn i ein depresjon og vart diagnostisert med Aspergers syndrom, OCD og selektiv mutisme.
– Det betyr ganske enkelt at eg berre snakkar når eg synest det er nødvendig. No er eitt av dei tidspunkta, forklarte ho under TED-føredraget i Stockholm.
Greta vil endra systemet
Thunberg meiner politikarane held fram å snakka om grøn, evig økonomisk vekst fordi dei er redde for å bli upopulære.
– De snakkar berre om å gå framover med dei same dårlege ideane som fekk oss inn i denne uføra, sjølv når den einaste fornuftige tingen å gjera er å dra i nødbremsa, sa 15-åringen på klimatoppmøtet.
Den svenske klimaaktivisten meiner det er på tide å behandla klimakrisa som ei krise, la fossilt brennstoff liggja og kanskje endra heile systemet.
– Me har ikkje kome her for å be verdsleiarar om å bry seg. De har ignorert oss før og de vil ignorera oss igjen. Me har gått tom for unnskyldningar og tida renn ut. Me har kome her for å fortelja dykk at forandringa kjem, anten de likar det eller ikkje. Den verkelege makta tilhøyrer folket, avslutta 15-åringen.
