Italias nye innanriksminister vil ha oppteljing og utvising av romfolk
Denne artikkelen er eldre enn 1 år gamal. Det betyr at noko av informasjonen kan vere utdatert.
Det var i eit TV-intervju måndag at innanriksminister og leiar av det sterkt høgrepopulistiske partiet Ligaen Matteo Salvini presenterte planane sine. Ministeren vil setja i gong ei folketeljing av romfolka i landet, og utvisa dei som ikkje har papira i orden.
Det er same Salvini som nyleg nekta å ta imot migrantskipet Aquarius.
– Dessverre må vi behalda italienske romfolk, for du kan ikkje utvisa dei, sa Salvini i intervjuet.
Forslaget har møtt krass kritikk frå regjeringspartnarane i Femstjernersrørsla og EU-kommisjonen, som begge viser til at det er ulovleg å utvisa borgarar basert på etnisitet.
Ligaen er for tida største parti på meiningsmålingane i Italia.
Trekk parallellar til fascismen
Italienske politikarar frå sentrum-venstre er opprørte over forslaget, og viser til at Italia har ei «frykteleg» historie. Også under fascismen dreiv landet med oppteljing av minoritetar – den gong av jødar.
Opprettinga av «aksen Roma-Berlin» i 1938, under diktatoren Benito Mussolini, var starten på det fascistiske Italia. I løpet av verdskrigen blei tusenvis av italienske jødar deportert og myrda i konsentrasjonsleirar.
Opposisjonen i Italia trekk nå parallellar mellom Salvini sitt forslag og desse hendingane.
Det bur rundt 170 000 romfolk og sinti (ei undergruppe av romfolk) i Italia. Dei fleste av desse har fast bustad og normalt arbeid, skriv tyske Die Zeit.
