Ungdomsparti vil ha ny utgreiing av fjorddeponi
Fleire ungdomsparti saman med Natur og ungdom krev at Stortinget seier nei til gruvedeponi i ei avstemming torsdag.
Denne artikkelen er eldre enn 1 år gamal. Det betyr at noko av informasjonen kan vere utdatert.
Alle ungdomspartia bortsett frå Senterungdommen, Unge Høgre og Framstegspartiets Ungdom er einige om at Stortinget bør stemme for ei ny vurdering av gruveprosjekta ved Førdefjorden i Sogn og Fjordane og Repparfjorden i Finnmark, skriv Klassekampen.
Stortinget skal torsdag behandle eit forslag frå SV om at styresmaktene må behandle saka på nytt.
- LES OGSÅ: NU-leiaren søker jobb i Nordic Mining
AUF skuffa over Ap
– Ungdomsorganisasjonane er opptatt av at vi skal ha ein moderne og berekraftig gruveindustri, og då skal ein ikkje bruke løysingane frå i går. Å dumpe avfallet i sjøen er eit gufs frå fortida, seier Natur og ungdoms leiar Gaute Eiterjord.
Ap, Høgre og Frp har gitt løyve til utvinningsprosjekta i dei to fjordane. AUF går dermed mot sitt eige parti.
– Eg er skuffa over Ap og håpar partiet snur i denne viktige miljøsaka, seier nestleiar Ina Libak.
– Kan ikkje angra seg
Administrerande direktør i Nussir, selskapet bak gruveprosjektet i Kvalsund som skal ha sjødeponi i Repparfjorden, tar SVs forslag med knusande ro.
– Vi har allereie utsleppsløyve. Då kan ikkje styresmaktene berre banke på døra og seie at ein har angra seg, seier han.
