Vil innføre praksis i alle studiar
LO og NHO vil gjere studiar meir relevante for arbeidslivet og vil at alle høgare utdanningar skal ha poenggjevande praksis.
![](https://framtida.no/wp-content/uploads/2023/09/Framtida-logo-160x160.png)
![info](https://framtida.no/wp-content/themes/framtida/images/info.png)
Denne artikkelen er eldre enn 1 år gamal. Det betyr at noko av informasjonen kan vere utdatert.
Studentar som skal bli legar, sykepleiarar, lærarar og advokatar er blant gruppene som allereie har praksis i arbeidslivet som ein del av utdanninga.
Dei to organisasjonane vil at alle skal ha ei liknande ordning, skriv Adresseavisen :
– Universiteta og høgskulane må bli flinkare til å styrkje arbeidslivsrelevansen. Eit tiltak er å innføre studiepoeng for praksisopphald, seier Hans-Christian Gabrielsen, andre nestleiar i LO. Han seier studentar som er ute i praksis har mindre fråfall i studiet og kjem seg raskare i jobb. I tillegg meiner han erfaringa gjer dei meir attraktive på arbeidsmarknaden.
LES OGSÅ: Lærarar får praksis i barnehagar og på vidaregåande.
Etterlyser praksis
Ei undersøking blant alle studentar viser at halvparten etterlyser praksis i studiane. 71 prosent av dei som har hatt praksisopphald, seier seg godt fornøgd med ordninga.
LO og NHO vil også ha obligatorisk praksis i fag som historie og statsvitskap.
– Dei færraste av studentane kjem til å ha ein yrkeskarriere innan akademia, seier administrerande direktør Kristin Skogen Lund i NHO. Ho trur praksis vil styrkje, snarare enn svekkje, den teoretiske delen av faga.
– Eg trur studenten får meir ut av studiane med litt relevant erfaring og kunnskap om korleis faget blir brukt.