Eksamen før russetida, krev fire fylke
Oslo, Akershus, Rogaland og Buskerud går saman i kravet om å gjera ferdig russefeiringa før eksamenstida.
Denne artikkelen er eldre enn 1 år gamal. Det betyr at noko av informasjonen kan vere utdatert.
Vil ha eksamen før russetida
Dei meiner det bør bli ei nasjonal ordning, skriv Aftenposten. Dei fire fylka gjekk denne veka saman og ville at kunnskapsministeren skulle gjera om på det siste skuleåret på vidaregåande – slik at skriftleg eksamen vart unnagjort før russefeiringa byrja.
– Russetida er komen for å bli, og me veit at russetida er ein gigantisk støysendar inn i eksamensarbeidet. Me har vore opptekne av å forsøka å finna ein betre måte å kombinera russefeiring og eksamensavvikling på, seier Anniken Hauglie (H), skulebyråd i Oslo, til Aftenposten.
LES OGSÅ: – Framtidas russ er sykkelruss
Vanskeleg å innføra
Forslaget har allereie fått støtte – både frå russen som Aftenposten har snakka med, og påtroppande leiar av Elevorganisasjonen, Kristoffer Hansen.
Det er noen som er uenig i at rekkefølgen bør være: skole -> sluttvurdering -> russetid?
— Kristoffer Hansen (@KrisHansen_) 12. mai 2015
Kunnskapsdepartementet sjølv meiner forslaget vil bli vanskeleg å innføra.
– Ein må ha alle arbeidstakarar med seg for å gjennomføra såpass omfattande endringar i skuleåret. Eg forstår kvifor ein ønskjer dette, men vil også understreka at russefeiring er ei privatsak, seier statssekretær i Kunnskapsdepartementet, Birgitte Jordahl (H).
Ho legg til at dei vil vurdera å lata fylka testa ei slik ordning, om dei klarar å forhandla ein timeavtale med lærarane, garanterer at alle elevar får minstetalet med timar, og at dei sjølv tek rekninga med å utvikla eit eige eksamenssett.
LES OGSÅ: – Dagens russ er for snille
