– Åtak på nynorske barn og unge
Regjeringa vil kutta all støtte til LNK, som mellom anna står bak drifta av Framtida.no. Dét vekkjer reaksjonar.
Denne artikkelen er eldre enn 1 år gamal. Det betyr at noko av informasjonen kan vere utdatert.
– Åtak på nynorsk ungdom
– Regjeringa spenner bein under suksessrike nynorske barne- og ungdomssatsingar nett og språkkurs i kommunar når dei kuttar ut støtta til Landssamanslutninga av nynorskkommunar, seier styreleiar for Landssamanslutninga av nynorskkommunar (LNK) Solfrid Borge, i ei pressemelding.
I 2014 fekk LNK 1.088.000 kroner i støtte over statsbudsjettet. No vil regjeringa kutta all støtte.
– Dette får dramatiske konsekvensar for heile drifta til organisasjonen, seier styreleiar Solfrid Borge.
LES OGSÅ: Vil spreie kulturmakta i Noreg
Kuttar all støtte til nynorsk-suksessar
LNK står blant anna bak Framtida.no, som er det einaste nasjonale nyhendetilbodet på nynorsk for unge.
– Økonomisk støtte frå LNK har vore heilt avgjerande for Framtida.no. Det har gjort oss i stand til å veksa og koma der me er i dag, med aukande tal lesarar, journalistar og inntekter, seier redaktør i Framtida.no, Svein Olav B. Langåker.
Dersom all støtte blir kutta, må LNK òg seia opp avtalen med Magasinett og Pirion, som er viktige nynorske tilbod i skulen og barnehage, både for dei som har nynorsk som hovudmål og sidemål.
– Dette strir mot målet i regjeringserklæringa om å gjera sidemålsopplæringa meir engasjerande, seier Solfrid Borge.
LES OGSÅ: Held på sidemål – droppar mållova
Målkritikk
Karl Peder Mork, leiar i Norsk Målungdom, meiner kuttet i støtta til LNK er eit åtak på nynorsk barn og ungdom.
– Det er eit ganske vanvittig framlegg, og eit åtak på barn og unge sine høve til å få lesa nyhende på nynorsk. Eg klarar ikkje å forstå argumentet for kuttet, seier Mork.
Òg nestleiar i Noregs Mållag, Sigbjørn Hjelmbrekke, tykkjer framlegget frå departementet er vanskeleg å forstå.
Han peikar på at LNK driftar tre viktige tilbod for formidling av nynorsk til barn og unge.
– Sidene har fått eit lyft dei siste åra, og talet på lesarar aukar. Det er merkeleg at det ikkje skal finst pengar til eit så godt tiltak, seier Hjelmbrekke, i ei pressemelding frå Mållaget.
Kommuneutfordringa
Nestleiaren i Mållaget stussar òg over at dette kuttet kjem midt i det førebuande arbeidet med kommunereforma.
– I kommuneproposisjonen som vart lagt fram før ferien, slår ein fast at det er viktig å sikra nynorsk og samisk i reformprosessen, slik at ikkje samanslåingar får den utilsikta konsekvensen at dei mindre brukte språka vert ramma. Nynorsk vil ha ein utsett posisjon mange stader, og det er stor trong for å tenkja nytt om korleis intensjonane frå dagens lovgjeving kan vidareførast for å sikra nynorskområda i mange fylke, meiner Hjelmbrekke.
Då kulturminister Thorhild Widvey vitja Sogn og Fjordane i vår erkjente ho at kommunereforma kunne få konsekvensar for nynorsken.
– Det er ille at regjeringa vil kutta heile løyvinga til Landssamanslutninga av nynorskkommunar no når alle kommunar skal drøfta si eiga framtid, meiner styreleiar i Nynorsk kultursentrum, Lodve Solholm.
Faktaboks
Landssamanslutninga av nynorskkommunar (LNK) er ei samanslutning av kommunar, fylkeskommunar og interkommunale tiltak med føremål å fremje nynorsk språk og kultur i offentleg verksemd. 103 kommunar, fire fylkeskommunar og 17 interkommunale tiltak og regionråd er med i samanslutninga, som vart skipa i 1993.
