Rekordhøgt tilbod om studieplass
Nesten 80.000 håpefulle fekk torsdag tilbod om studieplass til hausten.
Denne artikkelen er eldre enn 1 år gamal. Det betyr at noko av informasjonen kan vere utdatert.
Samordna opptak har sendt tilbod til 79.404 personar som har søkt på høgare utdanning. Det er ein auke på 6,6 prosent frå i fjor, noko som vil seie at 4.900 fleire har fått tilbod om studieplass.
Rundt 60 prosent får begynne på førstevalet sitt i august og det har dermed vore ein auke i talet på kvalifiserte søkjarar.
Ifølgje Kunnskapsdepartementet har aldri så mange fått tilbod om studieplass som i år. Det er planlagt over 1.000 fleire studieplassar. Dette heng saman med det høge talet på søkjarar i april, med 6,8 prosent fleire søkjarar enn året før.
– Dette er det høgste talet på søkjarar vi har hatt i historia til Samordna opptak, sa Bente Ringlund Bunæs tidlegare i år i ei pressemelding.
– Det ser ut til at det er ein auka interesse for høgare utdanning i befolkninga, meinte Bunæs.
Dersom ein ikkje er tilbode plass nokon stad ved hovudopptaket, er det framleis ledige studieplassar ved 417 ulike studium fordelt på 30 lærestader. (©NPK)
