«Regjeringa sin ruspolitikk er direkte dødeleg»

Over 1000 personar har døydd av overdose sidan Arbeidarpartiet stemte ned rusreforma i 2021.

Regjeringa sin ruspolitikk er direkte dødeleg. Det sjokkerer meg at Jonas Gahr Støre stolt kan leggje fram ei «rusreform» som straffar folk for å ha litt cannabis på seg, og som fører til at unge ikkje tør å ringje ambulanse i frykt for fengselsstraff.

Det er fire år sidan Venstre la fram sitt forslag til rusreform. Dette var ei rusreform som ville ha redda liv, men Arbeidarpartiet vippa i siste liten og stemte ho ned.

For Arbeidarpartiet verkar det som om det viktigaste er å halde liv i utdaterte fordommar og ideologiar. Regjeringa må lytte til det vitskapen seier og setje i verk tiltak som reddar liv.

Vi treng ei regjering som forstår at rusavhengnad er eit helseproblem, ikkje eit justisproblem. Det hjelper ikkje å straffe rusavhengige – verken fengsel eller bot bidreg til behandling eller skadereduksjon. Tvert imot gjer det situasjonen mykje verre for dei som slit.

Det er nødvendig at vi avkriminaliserer, slik at vi faktisk kan møte rusavhengige med hjelp i staden for straff.

For å unngå at 1000 fleire døyr av overdose, treng vi eit regjeringsskifte, og vi må halde fram med å kjempe for ein meir human ruspolitikk