Listhaugs statssekretær ønsker fri innvandring
Justisminister Sylvi Listhaugs (Frp) nye statssekretær Sveinung Rotevatn (V) meiner friast mogleg innvandring i verda bør vere eit politisk mål.
Denne artikkelen er eldre enn 1 år gamal. Det betyr at noko av informasjonen kan vere utdatert.
Rotevatn seier dette om reaksjonane på rolla hans som ny statssekretær hjå justisministeren.
– Då eg tiltredde, omtalte enkelte meg som Venstres vaktbikkje og enkelte som Listhaugs gissel. Eg skal ikkje vere nokon av delane, men ser på meg sjølv som ein brubyggjar, seier han til Aftenposten.
– Vi er eit team
Han påpeikar at det klart det vil vere prosessar der dei to har ulike syn.
– Men du kjem ikkje til å sjå at vi er ute og meiner ulike ting om same tema. Slik kan det ikkje fungere. Vi er eit team.
Statssekretæren seier at for han blir jobben å korte ned avstanden mellom Venstre og Frp, og legg til:
– Mitt personlege syn er at ei friast mogleg innvandring i verda bør vere eit politisk mål.
– Komfortabel
Rotevatn meiner det er for tidleg å seie om Jeløy-erklæringa strammar inn eller mjukar opp innvandringspolitikken. Men seier det er peikepinnar til innstrammingar når det gjeld familiegjenforeining, samtidig som det er liberaliseringar på arbeidsinnvandring utanfor EØS og ambisjonar om å ta imot endå fleire kvoteflyktningar.
– Eg er komfortabel med det som står der, understrekar han.
(©NPK)
