I sommar blei han verdsmeister. No er Karsten Warholm blitt MOT-ambassadør
– Han passar veldig godt som MOT-ambassadør og førebilete for ungdom, seier 10. klassingar ved Ulstein ungdomsskule.
Denne artikkelen er eldre enn 1 år gamal. Det betyr at noko av informasjonen kan vere utdatert.
Verdsmeisteren kom heim og blei MOT-ambassadør
Saka er henta med velvilje frå Vikebladet Vestposten.
Denne veka signerte Karsten Warholm, nybakt verdsmeister på 400 meter hekk under på ein avtale om å verte MOT-ambassadør. Det går fram av ei pressemelding frå Ulstein – Lokalsamfunn med MOT.
– Eg har sett at det er eit arbeid som er viktig. Eg ser at det har vekse mykje sia eg gjekk her og det er bra, seier Karsten Warholm i pressemeldinga.
Dei unge MOTivatorane i 10.klasse synest det er gøy at Karsten vil vere MOT-ambassadør for Ulstein.
– Det er ekstra gøy for oss som går på friidrett, at han kjem frå vår klubb Dimna, samstemmer Mats Fredriksen og Anette Lydersen, som er to av fjorten 10.-klassingar som er skulerte som «Ung MOTivator» ved Ulstein ungdomsskule.
– Det at han takkar ja seier noko om han som person og han passar veldig godt som MOT-ambassadør og førebilete for ungdom, held Mats og Anette fram.
- Møt verdsmeisteren: – OL var fantastisk kult
Ulstein – Lokalsamfunn med MOT er stolte av å få med Karsten Warholm på det lokale MOT-laget. Her signerer han avtale saman med MOT-rektor Leon Romestrand ved Ulstein ungdomsskule og MOT-leiar og ordførar Knut Erik Engh i Ulstein kommune. Foto: Marie Flatin
– Viser at han bryr seg
Det var ordførar Knut Erik Engh og rektor Leon Romestrand ved Ulstein ungdomsskule som var med på signeringa av MOT-avtalen med Karsten Warholm.
– Det er kjempekjekt at han Karsten vil vere med som MOT-ambassadør i Ulstein. Det viser at han bryr seg om lokalsamfunnet sitt, og at han sjølv har gode erfaringar med MOT frå tida då han hadde dette programmet i ungdomsskulen, seier MOT-leiar og ordførar i Ulstein, Knut Erik Engh.
Romestrand er einig med orføraren.
– Det er veldig bra at vi har fått inn Karsten Warholm som lokal MOT-ambassadør i Ulstein kommune. Karsten lev opp til dei gode verdiane til MOT, og vi er sjølvsagt stolte over at han er tidlegare elev ved ungdomsskulen. Vi er allereie i dialog rundt eit opplegg der alle elevane ved Ulstein ungdomsskule får møte Karsten og høyre korleis han har arbeidd for å bli verdsmeister, seier MOT-rektoren ifølgje pressemeldinga.
