Gilberto Mora er VMs yngste spelar
17-åringen frå Mexico drøymde om å spele på dei same banene som Messi, Ronaldo og Neymar. No kan draumen bli sann.
– Heilt ærleg inspirerer det meg mykje at folk har så høge forventningar til meg og trur eg kan nå langt, seier Gilberto Mora i eit intervju med magasinet GQ Mexico.
Mora er ifølgje Fifa den yngste spelaren i årets fotball-VM for herrar.
På VMs opningsdag er meksikanaren 17 år og 240 dagar.
VMs yngste spelarar
Alder på opningsdagen av VM 11. juni 2026:
1: Gilberto Mora – Mexico (17 år og 240 dagar)
2: Hugo Sochurek – Tsjekkia (18 år og 4 dagar)
3: Ibrahim Mbaye – Senegal (18 år og 138 dagar)
4: Hamza Abdelkarim – Egypt (18 år og 161 dagar)
5: Bara Sapoko Ndiaye – Senegal (18 år og 162 dagar)
6: Mladen Jurkas – Bosnia-Hercegovina (18 år og 247 dagar)
7: Ayyoub Bouaddi – Marokko (18 år og 252 dagar)
8: Kerim Alajbegovic – Bosnia-Hercegovina (18 år og 263 dagar)
9: Rayan Elloumi – Tunisia (18 år og 267 dagar)
10: Lucas Herrington – Australia (18 år og 279 dagar)
11: Behruzjon Karimov – Usbekistan (18 & 308)
12: Lamine Yamal – Spania (18 år og 333 dagar)
13: Kendry Paez – Ecuador (19 år og 38 dagar)
14: Tyler Fletcher – Skottland (19 år og 84 dagar)
15: Luka Vuskovic – Kroatia (19 år og 107 dagar)
16: Pau Cubarsi – Spania (19 år og 140 dagar)
17: Yan Diomande – Elfenbeinskysten (19 år og 209 dagar)
18: Rayan – Brasil (19 år og 312 dagar)
19: Endrick – Brasil (19 år og 325 dagar)
Heimehåp
Mexico er vertsnasjon for fotball-VM saman med USA og Canada.
Etter fiaskoen i 2022, der Mexico rauk ut i gruppespelet, håpar meksikanarane no at det unge stjerneskotet kan bidra til at laget får revansje.
– Eg er veldig motivert for å representere landet mitt på heimebane og vise at vi er eit sterkt lag og at vi kan kjempe, seier Mora i intervjuet med GQ.
Sportsnettstaden ESPN spår at Mora kan bli årets store gjennombrot i VM.
Stjerneskot
Gilberto Mora er son av ein meksikansk fotballspelar med same namn.
17-åringen spelar til dagleg for klubben Tijuana i den meksikanske toppdivisjonen Liga MX. Ifølgje ESPN har han blitt kopla til storklubbar i Premier League, og Real Madrid og Barcelona.
Trass sin unge alder har Mora oppnådd mykje på fotballbana.
Som 15-åring blei han den yngste målskåraren i Liga MX si historie. Som 16-åring blei han tidenes yngste til å vinne eit internasjonalt trofé, med Mexicos siger i Concacaf Gold Cup. Det er det nord-, mellomamerikanske og karibiske meisterskapet.
Gilberto Mora under ei trening i Mexico City 8. mai 2026. Foto: AP Photo/Fernando Llano
Draumemøte
– Eg likte å tenke at eg ein dag kunne spele på dei same banene som fotballspelarane eg beundra, som Cristiano Ronaldo, Lionel Messi eller Neymar, fortel Mora til GQ.
Akkurat det kan 17-åringen faktisk oppnå. Ikkje berre kan han spele på same bane som idola sine, han kan faktisk ende med å møte dei i kamp. Ronaldo, Messi og Neymar er alle tatt ut i troppen til landslaga sine.
Men då må Mexico gå vidare frå gruppespelet. Kanskje får vi sjå Mora i aksjon allereie i opningskampen mellom Mexico og Sør-Afrika 11. juni.
● Les også: Yamal (16) er tidenes yngste EM-spelar
