Slaktar forslag om kutt i arbeidsavklaring
Unge Funksjonshemma fryktar at fleire kan bli uføre dersom forslaga til arbeidsminister Anniken Hauglie går gjennom.
Denne artikkelen er eldre enn 1 år gamal. Det betyr at noko av informasjonen kan vere utdatert.
Fredag presenterte arbeidsminister Anniken Hauglie (H) fleire forslag om innstramming i ordninga med arbeidsavklaringspengar. Om forslaga går gjennom, skal det bli vanskelegare å få arbeidsavklaringspengar og lettare å komma seg ut av ordninga. Målet er å hindra at for mange passivt tek imot stønad over lengre tid, seier Hauglie til VG.
I tillegg vil Hauglie at dei som får stønad, men som ikkje følgjer avtalen dei har med NAV, skal få eit trekk i stønaden på ti prosent.
Forslaget vart sendt ut på høyring fredag, og Unge funksjonshemma har i dag gått ut og refsa forslaget.
– Me fryktar at kutta vil føra til at fleire som kunne ha komme tilbake i jobb endar som uføre eller på andre økonomiske støtteordningar, fordi dei ikkje får nok tid og oppfølging, seier styreleiar Camilla Lyngen i ei pressemelding.
Ho er ikkje imponert arbeidsministerens plan for å gjera ordninga betre.
– Ho kjem med få konkrete forslag til betring, og brukar samstundes dette til å rettferdiggjera innskrenkingar i ordninga, seier Lyngen.
Les meir:
No skammar unge seg mindre for å gå til NAV. Forskarane trur namneendring og reform er grunnen.
