Halvparten av unge er bekymra for KI-utviklinga
Andelen unge som er bekymra for utviklinga innan kunstig intelligens (KI), har auka kraftig dei siste åra.
Til Ung-rapporten oppgir 50 prosent av dei spurde at dei er ganske eller svært bekymra for utviklinga av kunstig intelligens.
Det er opp frå 30 prosent i 2024 og 42 prosent i fjor.
– Denne bekymringa heng tett saman med bekymring for spreiing av falske nyheiter og misinformasjon, som også bekymrar rett i underkant av halvparten av dei unge, heiter det i undersøkinga.
Ung-undersøkinga er ein målgruppestudie frå Opinion som dekkjer ungdom mellom 15 og 25 år.
I rapporten kjem det også fram at 61 prosent er einige i at medieplattformer bør gjera meir for å fjerna eller regulera hatefult innhald. Heile sju av ti jenter meiner dette, medan halvparten av gutane svarer det same.
Berre 18 prosent meiner at folk som regel er respektfulle og hyggjelege i kommentarfelt på sosiale medium.
– Unge etterlyser tydelegare ansvar frå sosiale medieplattformer. Når så mange meiner at plattformene bør gjera meir mot hatefult innhald, er det eit signal om at dagens handtering ikkje blir opplevd som tilstrekkeleg, seier rådgivar Alexandra Palm i Opinion i ei pressemelding.
