«Gjer overtidsbetaling skattefri»

Eg meiner Høgre treng fleire nye idear. Vi er eit parti som er kjent for ansvarleg økonomisk politikk og trua på arbeidslinja. Det skal vi halde fram med å vere. Men vi kan ikkje berre forsvare det vi allereie har gjort. Vi må også tore å komme med nye forslag som gjer ein forskjell i folk sin kvardag.

Eit slikt forslag er å gjere overtidsbetaling skattefri.

For meg handlar dette om eit enkelt prinsipp: Den som jobbar meir, bør også få behalde meir.

Kvar einaste dag er det folk som seier ja til ei ekstra vakt. Sjukepleiaren som blir igjen nokre ekstra timar. Politibetjenten som dekkjer ei vakt. Handverkaren som jobbar utover kvelden for å bli ferdig med eit oppdrag. Dei gjer det fordi arbeidsplassen treng dei, fordi dei ønskjer å tene litt ekstra, eller fordi dei rett og slett stiller opp.

Likevel tek staten ein stor del av den ekstra lønna.

Eg meiner det er feil.

Vi i Høgre seier ofte at det skal lønne seg å jobbe. Då må det også lønne seg å seie ja når arbeidsplassen spør om du kan ta ei ekstra vakt.

Overtid er heller ikkje noko ubetydeleg. Ifølgje Statistisk sentralbyrå vart det i 2024 jobba betalt overtid tilsvarande rundt 33 000 heiltidsstillingar. Det viser kor viktig den ekstra innsatsen faktisk er.

Når så mange held hjula i gang ved å jobbe meir enn dei må, meiner eg dei fortener å sitje igjen med meir av lønna dei har jobba for.

Eg veit at nokre vil seie at staten taper skatteinntekter. Det er sikkert rett. Men politikk handlar om prioriteringar. Eg meiner det er betre å gi skattelette til dei som faktisk jobbar meir enn å la staten ta ein stadig større del av inntekta deira.

Dette handlar også om kva retning Høgre skal ta. Eg ønskjer at vi skal vere partiet som kjem med nye idear for dei som jobbar, skaper og tek ansvar. Vi skal ikkje berre snakke om arbeidslinja. Vi skal gjere ho sterkare.

Derfor håpar eg Høgre tør å løfte denne debatten.

La dei som tek ekstravakta, få behalde heile gevinsten av ho.

Det ville vore god Høgre politikk.