Klamydia-tala har gått rett i botn – lågaste på 20 år
Talet på klamydiatilfelle har falle som ein stein, viser nye tal frå Folkehelseinstituttet. Kvifor har dei ikkje noko klart svar på.
– Vi har ikkje noko sikker forklaring til denne nedgangen, men vi trur at mykje merksemd og godt førebyggjande arbeid har bidrege til dette, seier overlege Anne Olaug Olsen ved Folkehelseinstituttet (FHI).
Den same skjer også i dei andre skandinaviske landa.
– Nedgangen i mengd melde tilfelle for både gonoré og klamydia blant dei unge, gir grunn til optimisme, seier Olsen i ei pressemelding.
Folkehelseinstituttet har nettopp publisert ferske årstal for blodboren og seksuelt overførbare infeksjonar for 2025. Kjønnssjukdommar er infeksjonar som smittar ved seksuell kontakt. Dei vanlegaste i Noreg er mellom anna klamydia og gonoré.
Gonore og menn
For klamydia vart det meldt 22 297 tilfelle i 2025. Det er det lågaste talet på 20 år, og ein nedgang på 4 prosent frå 2024 og 21 prosent frå 2023.
Oslo er i toppen med 632 tilfelle (per 100 000), etterfølgt av Finnmark med 589 (per 100 000) og Troms med 513 (per 100 000).
For gonoré var det i 2022 og 2023 ein kraftig auke i talet på melde tilfelle. For 2025 ser ein endeleg at tala har falle sidan 2024. I 2025 vart det registrert 2864 tilfelle, det er ein nedgang på 9 prosent.
Likevel aukar talet på gonoré hos menn som har sex med menn i aldersgruppa over 30 år. Overlege Olsen i FHI meiner at aukande utfordringar med antibiotikaresistens gjer det ekstra viktig å førebyggje smitte med kondombruk.
– Samtidig er det avgjerande at personar som får påvist gonoré får tilpassa behandling og at seksualkontaktar blir smittespora, seier ho.
Stabilt for syfilis
Tala er stabile når det gjeld syfilis. I fjor vart det registrert 265 tilfelle, omtrent på same nivå som året før. Omtrent to tredelar av dei melde tilfella er menn som har sex med menn.
For hepatitt c vart det i 2025 meldt 221 tilfelle blant dei som er fødde her i Noreg.
– Majoriteten er menn som er smitta via injiserande rusmiddelbruk. Sidan 2021 har trenden hos personar fødde i Noreg vore stabil, seier Olsen.
Den avsluttande oppmodinga til overlegen er uansett: Bruk kondom.
– Det er særleg unge og menn som har sex med menn som har høg risiko for å bli smitta med seksuelt overførbare infeksjonar. Kondom er viktigaste ein kan gjere for å verne seg.
