Vekas viktigaste: Skyting på kongressmiddag og rekordvarmt Europa

Skyting på korrespondentmiddag

Ein mann er sikta for attentat mot Donald Trump, etter han forsøkte å storme ein gallamiddag sundag ettermiddag, skriv BBC.

Fleire viktige politikarar og offentlege personar var til stades på den årlege korrespondentmiddagen, mellom anna presidenten, visepresidenten og kabinettmedlemar.

Mannen skal ha sprunge gjennom sikkerheitskontrollen på staden med skotsikker vest og fleire våpen, men blei raskt stansa.

Ifølge tenestepersonar blei det fyrt av fleire skot, og ein Secret Service-agent blei treft, men ingen skal vere alvorleg skada. Den sikta risikerer livstid i fengsel.

I ettertid har det spreidd seg konspirasjonsteoriar om at attentatet var forfalska, noko Det kvite huset avviser.

Dei sameinste arabiske emirata trekker seg frå Opec

Dei sameinte arabiske emirata melde seg denne veka ut av Organisasjonen av oljeeksporterande land (Opec), skriv E24.

Opec består av elleve land som samarbeider om oljepolitikk, og står i dag for rundt 38 prosent av verdas oljeproduksjon.

Emirata trekker seg ut på grunn av nasjonale interesser. Det skjer samstundes som verda står overfor si største energikrise på fleire tiår, etter stenginga av Hormuzsundet.

Marknaden fall kort tid etter utmeldinga, men prisane henta seg raskt inn igjen.

Dei sameinte arabiske emirata var den tredje største produsenten i Opec i februar i år, og har vore medlem sidan 1967.

Koordinerte åtak frå jihadistar i Mali

Fleire væpna grupper i Mali har samarbeidd om å gå til åtak mot landet sitt militære den siste veka. Det starta med skytingar i hovudstaden Bamako, men har også involvert andre sentrale byar og stader med store militære basar, ifølge BBC.

Forsvarsministeren i landet vart drepen i det som ser ut til å vere ei sjølvmordsbombing, ifølgje mediet.

Ein militærjunta gjennomførte eit statskupp i Mali i 2020, og dei noverande styresmaktene i Mali er allierte med Russland. Det er forskjellige militante grupper i landet, nokre alliert med Al Qaida og IS, og andre er separatistar som er meir fokusert på å sikre uavhengige landområde. Ifølgje den separatistiske gruppa Azawad Liberation Front (FLA) har russiske leigesoldatar mått forlate Kidal-området, som har ein av dei største militære basane i landet.

FN sin generalsekretær António Guterres seier han er djupt bekymra over situasjonen og ber det internasjonale samfunnet om å finne løysingar mot at valdeleg ekstremisme spreier seg i det såkalla «Sahel»-området, som strekker seg frå kyst til kyst sør for Sahara.