Unge Venstre vil fjerne kommunalt vindkraft-veto
Svendsen-Yagci meiner at veto-innføringa var blant dei største feila under den borgarlege regjeringa.
Eit svik
– Vetoretten er eit svik for både min og kommande generasjonar. Vi har gitt ansvaret til lokalpolitikarar, og vi ser at lokalpolitikarane ikkje er best eigna til å forvalte det ansvaret, seier ungdomspartileiaren.
Han meiner meir fornybar energi er avgjerande for å løyse Noregs største utfordringar og viser til at dei fleste nye vindkraftprosjekt har stoppa opp etter at kommunane fekk vetorett.
– Noreg risikerer å få industridød om vi ikkje byggjer meir kraft. Krafta må vere både grøn og rimeleg, og der sjekkar landvind av, seier han.
Kommunane får avgjerande rolle
Venstres Grunde Almeland, som sit i energi- og miljøkomiteen på Stortinget, meiner det er betre å gi økonomiske gulrøter til kommunane som vil byggje ut.
Norske kommunar fekk i praksis vetorett mot landbasert vindkraft frå 1. juli 2023, då endringar i plan- og bygningslova og energilova tredde i kraft.
Det kan ikkje lenger bli gitt konsesjon til vindkraftanlegg på land utan at kommunen først har vedteke ei områderegulering – noko som gir kommunane ei avgjerande rolle i om vindkraft skal byggjast ut i deira område.
