Derfor stod det «Føkk KrF» på Oslo Pride-singleten min
Eg gjekk ikkje med den for å hetsa KrF som enkeltparti, men for å peika på eit større problem, skriv Stein Phabian Strømme Eide (17).
Dette er eit meiningsinnlegg og gjev uttrykk for skribenten sine eigne meiningar. Innlegget er omsett frå bokmål av Framtida.no.
Den 28. juni gjekk eg saman med hundretusen andre nordmenn i Oslo Pride.
Det er ein dag for glede, solidaritet og fellesskap, men også for kamp.
Pride handlar ikkje berre om glitter og paradar, men om å synleggjera ei gruppe menneske som framleis opplever diskriminering, hets og utryggleik, sjølv i eit land som liker å tru at me har komme langt.
Føkk KrF
I år hadde eg på ein singlet der det stod på framsida: «Føkk KrF sine konservative meninger om skeive», og på baksida: «Beskytt transpersoner». Den fekk både jubel og tomlar opp frå tilskodarar langs ruta.
Eg gjekk ikkje med den for å hetsa KrF som enkeltparti, men for å peika på eit større problem, nemleg korleis politikken deira, og den retninga delar av den norske politikken har teke, rammar skeive og særleg transpersonar.
Millionar av skeive lever kvar dag med frykt
Millionar av skeive, både i Noreg og i verda, lever kvar dag med frykt. Frykt for å bli angripen, nekta helsehjelp, mobba på skulen, kasta ut heimanfrå, eller i verste fall fengsla eller drepne.
Denne røyndommen blir ikkje betra av at politikarar i eit såpass trygt og rikt land som Noreg byrjar å prioritera politikk som gjer det vanskelegare å vera skeiv.
Flaggforbod
Eit døme er KrFs nye vedtak om å forby bruk av Pride-flagget på offentlege skulars flaggstenger.
Dette handlar ikkje om nøytralitet, slik dei påstår, det handlar om å fjerna støtte og synlegheit for ei gruppe som framleis kjempar for aksept og rettar. Når ein tek bort flagget, tek ein også bort tryggleiken for dei skeive barna som treng det mest.
Den fridommen og tryggleiken mange skeive i Noreg nyt i dag, er resultatet av mange tiår med kamp, som dei før meg dreiv og som eg og min generasjon kjem til å halda fram med å driva.
Den fridommen er ikkje gitt, og den kan takast tilbake
Den fridommen er ikkje gitt, og den kan takast tilbake.
Dette ser me i fleire europeiske land, spesielt Ungarn som nyleg forbaud pride paradar, i USA, og no, meir forsiktig, også her heime.
Derfor er det viktigare enn nokon gong å seia frå. Å vera tydeleg. Å stå opp mot dei kreftene som ønskjer å gjera skeive liv mindre synlege og mindre verdt.
Verna kvarandre
Pride handlar ikkje berre om å feira kven me er, han handlar også om å verna kvarandre.
Og av og til betyr det å ta på seg ein singlet med eit provoserande ordtak, men med ein klar bodskap.
Ikkje for å irritera, men for å minna folk på kva som står på spel.
