Vekas viktigaste: Brann i Los Angeles og Trump vil ha Grønland

Storbrann i Los Angeles

Over 180 000 menneske har måtta forlate heimane sine på grunn av storbrannar som herjar i Los Angeles-området i California, melder Reuters. Det er dei verste brannane i Los Angeles gjennom tidene, skriv nyheitsbyrået.

Minst ti personar er døde.

Lite regn dei siste månadane, kombinert med sterk vind, gjer at brannane har fått spreie seg.

Brannvesenet i Los Angeles har hatt store utfordringar med vassforsyninga under arbeidet med å sløkkje brannen i nabolaget Pacific Palisades, som er den største brannen i området, skriv VG.

Skodespelarar og kjendisar som Paris Hilton og den norske regissøren Joachim Rønning er blant dei som har mista husa sine. Over 10 000 bygningar er øydelagde.

Trudeau trekker seg som statsminister i Canada

På ein pressekonferanse måndag ettermiddag fortalde den kanadiske statsministeren gjennom ti år at han trekker seg. Justin Trudeau (53) har leia Det liberale partiet sidan 2013. Han seier han vil halde fram i rolla til partiet har valt ny leiar.

Dei siste månadane har populariteten hans dala, og regjeringa har så vidt overlevd fleire mistillitsforslag. I tillegg har det vore intern usemje i partiet. I desember gjekk finansminister Chrystia Freeland av etter usemje om korleis dei skulle svare på Donald Trumps trugslar om 25 prosent toll på kanadiske varer.

Nasjonalforsamlinga blir no oppløyst fram til 24. mars. Etter planen skal det vere val i Canada i oktober.

126 døde i jordskjelv i Tibet

Eit jordskjelv råka tysdag morgon Tibet. Skjelvet hadde ifølgje Det amerikanske jordskjelvsenteret U.S. Geological Survey styrke 7,1.

Ifølgje kinesiske styresmakter er minst 126 personar stadfesta døde og 188 skadde, skriv NRK.

Episenteret til skjelvet var mellom den heilage byen Shigatse og Mount Everest på grensa til Nepal. Det råka området mista både straum og vatn.

Lyspunkt: Dyrare brus gjorde borna i England sunnare

I 2018 kom styresmaktene i Storbritannia med ei ny avgift på drikke med høgt sukkerinnhald. Det har mellom anna gjort det dyrare å kjøpe brus. Det har fått god effekt.

Ein ny studie syner at borna i snitt fekk i seg 4,8 gram mindre sukker kvar dag. Det utgjer 1,7 kilo sukker i året.