AUF-leiaren etterlyser fornying av partiet
Arbeidarpartiet skrik etter fornying og yngre krefter, meiner AUF-leiaren. Samstundes meiner han det blir for enkelt å berre peike på partileiaren.
– Ap byrjar å bli for gammalt. Vi heng ikkje med i tida. Det er for få unge medlemmer i partiet. Vi må fornye oss, seier AUF-leiar Gaute Børstad Skjervø til Vårt Land.
Det har vore sterkt press mot AP-leiinga den siste tida etter historisk dårlege målingar heilt nede på 14-talet for partiet. I helga vart det kjent at partisekretær Kjersti Stenseng ikkje tek attval til våren. Ho viste til at ho ville bidra til ei fornying ho meiner partiet treng.
AUF-leiaren vil ikkje peike direkte på partileiar Jonas Gahr Støre.
– Dei som trur du kan fikse alle Aps problem med å byte ut Jonas, eller ved å behalde Jonas, dei tek feil, seier Skjervø.
– Jonas er partileiaren min, men det er lov å vere usamd om han. No skal landsmøtet ta stilling til det. Der skal eg seie mi meining internt og ikkje i media, seier han.
Han meiner partiet må vere ærlege om at regjeringsprosjektet ikkje har lykkast med å vinne tilliten til folk.
– Vi i AUF og LO har heile vegen ønskt å ha med SV i regjering. At vi har mislykka med dette, har veljarane våre likt dårlege. Det må vi erkjenne og gjere noko med, seier Skjervø.
AUF-leiaren trekkjer også fram lakseskatten til regjeringa, som noko han meiner er eit utmerkt døme på korleis Ap har feila.
