Mållaget vil ha nynorsk inn i Grunnlova

– Det er stor stridsvilje i Mållaget. Vi er i vekst og skal krevje meir i åra som kjem. Det vi vedtek på landsmøtet i helga, må bli nasjonal politikk, seier leiar Peder Lofnes Hauge.

Til helga samlast Mållaget til landsmøte i Trondheim, der dei mellom anna skal diskutere opplæringspolitikk, lærarutdanning og språkteknologi.

Kravet om å få norsk språk og sidestilling mellom nynorsk og bokmål inn i Grunnlova vil også stå sentralt.

– Det er på høg tid at Grunnlova slår fast at norsk er nasjonalspråket i Noreg, og at nynorsk og bokmål er skriftspråka. Nynorsk må inn i Grunnlova, seier Hauge.

Mållaget melder om medlemsvekst. Dei hadde 15.862 betalande medlemmer i fjor, det høgaste talet sidan 1985.