Bjørn-Sigurd designar dataspel: – Matte er gøy når du faktisk brukar det til noko

– Om du synest matte er kjedeleg, er det fordi skulen får deg til å tru at matte er kjedeleg. Det er ganske gøy når du faktisk brukar det til noko, som å skrive kode, fortel Bjørn Sigurd Sælevik Fjose engasjert.

Han held føredrag om fritida si under PechaKucha på Stord. 17-åringen fortel at han kan sitje i timesvis og skrive kode. Heile dagar har gått med i kode-bobla, der han berre reiser seg for å ete.

– Eg skjønar ikkje heilt korleis eg ikkje vert lei, seier han.

Foto: Bjørn Sigurd Sælevik Fjose

• Les også om Amanda (12) som lærer vekk koding til jamaldrande. Ho fortel at det er lett (når du først kan det)!

Speldraumen

Frå Pecha Kucha-scena på Stord skildrar Bjørn Sigurd seg sjølv som ein kreativ type – han lagar filmar, tek bilete og går på medielinja på skulen. Det siste året har han også oppfylt ein draum mange har: Han lagar sine eigne dataspel.

Det får han til ved hjelp av koding:

– Då skriv ein eit språk som PC-en forstår – det er masse logikk, ein del matte, og mykje problemløysing du lyt halde på med, seier han.

I programmet han brukar, Unity, er det berre fantasien som set grenser. Du kan lage kva du vil: kjempestore, kompliserte spel eller små, enkle spel.

– Og så er det endelaust mange måtar å skrive koden på, det er ingen fasitsvar.

Slik ser det ut når Bjørn Sigurd Sælevik Fjose skriv kode. Foto: Privat

• Les også om skulen der elevane gamar i timen: – Det gir elevane moglegheit til å dyrke fram ferdigheitene vi leiter etter

Planlegging er nøkkelen

Med så mange mogelegheiter er det avgjerande å planlegge. Viss ikkje vert det berre rot og du vert lei av det du held på med, seier 17-åringen.

Bjørn Sigurd fortel at mange gapar over for mykje for tidleg. Ein berre lastar ned eit program for å lage spel, og vert overvelda av alt ein kan gjere.

– Ein må ta det litt trinn for trinn, seier han.

I programmet Blender lagar Bjørn Sigurd Sælevik Fjose 3D-figurar til spelet sitt: – Du kan animere dei, og legge på tekstur og materiale. Det er ganske tidkrevjande, fortel 17-åringen. Foto: Privat

Det er fleire ting du lyt tenkje over før du set i gong. Vil du ha ei historie i spelet ditt? Eit lydspor? Korleis skal spelet eigentleg fungere?

Bjørn Sigurd fortel at 30-40 prosent av tida han brukar på å lage spel difor går med til å leite etter inspirasjon og rettleiing. På internett finst det eit kvelv av gode kjelder, fortel 17-åringen. Han tipsar mellom andre om Brackeys på YouTube, som lagar enkle innføringsvideoar for gryande spel-designarar. Samstundes er det god læring i spelet Minecraft og i programmet Scratch.

– Dette har hjelpt meg forstå korleis skript verkar, seier Bjørn Sigurd Sælevik Fjose.

Sjå Bjørn Sigurd Sælevik Fjose sitt PechaKucha-føredrag her: 

Video: Salman Chaudhry og Thea Auestad, medielinja ved Stord vidaregåande skule.