Landbruket verst på mikroplastutslepp
Brorparten av all mikroplasten som endar opp i naturen, kjem frå landbruket, viser ei kartlegging som EUs kjemikaliebyrå (ECHA) har gjort. No vil EU-kontoret forby mikroplast i både gjødsel, kosmetikk og vaskemiddel, skriv Nationen.
Denne artikkelen er eldre enn 1 år gamal. Det betyr at noko av informasjonen kan vere utdatert.
ECHA reknar med at det samla blir sleppt ut 36.000 tonn mikroplast i EU kvart år. Av dette står landbruket for 23.500 tonn. Nummer to på lista, kosmetikk, står for 3.700 tonn.
– Alle trur at det er kosmetikken som har skulda. Her har fleire land innført lovgrenser. Men størstedelen av den tilsette mikroplasten kjem frå landbruket, sa Matti Vaino, sjef for risikohandtering i ECHA, til den finske rikskringkastinga YLE da forslaget vart lagt fram.
Årleg kutt på 20.000 tonn
Om framlegget blir vedtatt, reknar ECHA med eit gjennomsnittleg kutt i plastutsleppa på 20.000 tonn i året over ein tjueårsperiode. ECHA foreslår at forbodet mot mikroplast i gjødsel skal gjelde frå 2025.
Årsaka til dei høge utsleppa av mikroplast frå landbruket, er plasten som blir nytta i overflatebelegg og kapslar i kunstgjødsel og ugrasmiddel, ifølgje EU-kontoret.
Lurer du på forskjellen mellom mikroplast og plast? Her finn du svar.
