Vekas viktigaste: Putin-prat og Bolsonaro-flukt

Netanyahu mister fleirtal i Israel

Posisjonen til Israels statsminister Benjamin Netanyahu kan vere truga etter tysdagens val. Blokka som støttar Netanyahu har nemleg mista fleirtalet i Knesset, den israelske nasjonalforsamlinga.

Sentrumspolitikaren og militær-veteranen Gadi Eisenkot har sagt at han vil danne ei ny regjering, og har bede Netanyahu om å trekke seg.

Vegen til statsministerkontoret kan likevel bli smertefull for Eisenkot. Hans blokk har heller ikkje fleirtal i Knesset. Han vil difor vere avhengig av støtte frå dei palestinsk-israelske partia Felleslista og Ra’am, som ligg an til å få 19 av 120 mandat i Knesset.

Fleire av samarbeidspartnarane til Eisenkot har avvist at dei vil akseptere eit samarbeid med dei arabiske partia. Eisenkot har sjølv sagt at han kan samarbeide på visse vilkår.

• Les også: Er dette slutten for Netanyahus «personkult»?

Støre ringde Putin

Statsminister Jonas Gahr Støre og Finlands president Alexander Stubb hadde tysdag ein telefonsamtale med den russiske presidenten Vladimir Putin.

Putin fekk «klare meldingar» frå Støre og Stubb, seier Støre til NRK. Dei kravde at Russland trappar ned angrep på energi og korntransport i Ukraina, og bad om utveksling av fangar.

Putin viste på si side til «uavklarte spørsmål» som må løysast i forhandlingar.

Møtet skulle opphavleg vare i 20 minutt, men enda opp med å vare i halvannan time.

Dei to nordiske statstoppane har fått kritikk frå både inn- og utland. Danmarks statsminister Mette Frederiksen uttalte at ein må halde Europa samla i staden for å «gå solo». Møtet skal ikkje ha vore koordinert med andre europeiske leiarar. Støre på si side seier at andre allierte var informerte om samtalen, og at Volodymyr Zelenskyj sjølv hadde bede Støre og Stubb om å møte Putin.

Førre veke var Zelenskyj og amerikanske Steve Witkoff i Oslo for å drøfte fredsforhandlingar.

Bolsonaro flyktar etter valnederlag i Brasil

Luiz Inácio Lula da Silva vann presidentvalet i Brasil natt til måndag.

Den sosialistiske presidenten slo høgresidas Flavio Bolsonaro i den andre runden i valet, etter at ingen fekk fleirtal i første runde.

Bolsonaro, som først lova at han ville levere inn passet sitt, har no flykta til USA, der han har fått visum. Bolsonaro er under etterforsking for kvitvasking i Brasil.

Bolsonaro har kravt nyval, og i ein uttale i sosiale medium omtala Bolsonaro seg som Brasils «rettmessig valde president». Han har seinare endra omtalen av seg sjølv til «Brasils leiar». Faren Jair Bolsonaro nekta sjølv å erkjenne nederlag då han tapte presidentvalet i 2022, og sit no i fengsel for kuppforsøk. Eitt av valløfta til Flavio var å frigjere faren sin.

Lyspunkt: Håkon (8) samla inn 430 000 kroner til sjuke born

Håkon Høyland Hansen sette i gang ein stor innsamlingsaksjon, og leverte tysdag ein sjekk på 431 170 kroner til trivselstiltak på barne- og ungdomsavdelinga på Haukeland universitetssjukehus.

Håkon fann i sommar ut at han ville bruke haustferien på å sparke ein fotball frå Bergen til Voss. Strekka er over 100 kilometer. Det opphavlege målet var å samle inn 50 000 kroner.

Han gjennomførte bragda saman med far sin, og dei sov i telt på vegen.

Håkon har sjølv ei storesøster med kronisk sjukdom. Gjennom opphaldet hennar på sjukehuset har Håkon sett kor viktig det er med trivselstiltak som kino, teater, klovnar eller leik, fortel han til NRK.

Kreftforeininga seier til NRK at dei er avhengige av bidrag frå einskildmenneske og bedrifter.