Vekas viktigaste: Sola, jorda og månen

Assad dømd til døden

Den tidlegare presidenten i Syria, Bashar al-Assad, er dømd til døden in absentia i heimlandet sitt. Assad flykta til Russland, der han fekk politisk asyl då regjeringa hans fall i desember 2024. Syria har no bede Russland om å få Assad utlevert.

Assad vert skulda for lovbrot mot menneskeslekta og krigslovbrot under den 14 år lange konflikten i landet, som tok livet av om lag ein halv million personar.

Borgarkrigen i Syria braut ut i 2011 som eit opprør mot det undertrykkande Assad-regimet. Medan fleire andre regime i regionen vart styrta under den såkalla arabiske våren, klarte Assad-regimet lenge å halde på makta, med støtte frå Iran og Russland.

Ulike syriske opprørsgrupper og Den islamske staten (IS) var blant dei som ville styrte Assad.

PST åtvarar mot radikalisering på TikTok

Tre terrorangrep er avverja dei tre siste åra, ifølge Politiets tryggingsteneste (PST).

PST åtvarar om auka risiko for vald og terror frå ungdommar som vedkjenner seg ekstrem islamisme. Dei fleste er gutar mellom 15 og 17 år, fødde og oppvaksne i Noreg. Det er også konvertittar med i gruppa, seier PST til VG.

Tryggingstenesta meiner at norske ungdommar ser valdspropaganda på TikTok og spelplattformer, og at algoritmane tar dei frå ganske uskuldig innhald til grovare innhald og chattegrupper. Slik vert dei radikaliserte. Fascinasjonen for vald kjem gjerne før ideologien, seier Anne Mannsåker Roald, sjef for kontraterror i PST, til VG.

PST opplyser at dei viktigaste inspiratorane er IS og Al Qaida.

Ungdommane det gjeld, slit ofte på skulen og har vanskar med å finne plassen sin i sosiale fellesskap, fortel Roald.

Debuterte i partileiardebatt

Leiarane i ungdomspartia møttest til debatt under Arendalsveka onsdag. Temaa var innvandring og framtida til unge.

Fleire av debattantane påpeika at deira generasjon kan bli den første som vil få dårlegare liv enn foreldregenerasjonen.

Henriette Sjursen-Eriksen, leiar i Grøn Ungdom, og Alexandra Øhrn Fredwall, leiar i Raud Ungdom, peika på aukande sosial ulikskap og ein tøff bustadmarknad.

– Bustadmarknaden er ei ulikskapsmaskin, sa Sjursen-Eriksen.

Senterungdommen-leiar Nils Forren meiner på si side at unge sjølv må ta ansvaret for eiga framtid, komme seg tidleg i arbeid og spare pengar.

Unge Venstre-leiar Omar Svendsen-Yagci meiner forbod som hindrar unge i å jobbe, til dømes forbod mot å selje alkohol eller jobbe seint, må fjernast for å gi moglegheiter til fleire unge. KrFU-leiar Ingrid Olina Hovland tok til orde for at den første millionen ein tener bør vere skattefri.

Les også: Debuterer i direkte-debatt: – Nervøs for å choke