Oslo-ungdom trenar meir, rusar seg mindre
81 prosent av ungdommar trenar minst ein gong i veka – det høgaste nivået sidan 2015. Samtidig har bruken av narkotiske stoff gått ned sida 2023.
Det viser den ferske rapporten Ung i Oslo, basert på svar frå ungdommar frå 85 ungdomsskular og vidaregåande skular i Oslo. Velferdsforskingsinstituttet NOVA ved Oslomet står bak undersøkinga.
Undersøkinga i år er den største som er gjennomført i Oslo med mål om å kartleggje livskvaliteten blant norske tenåringar.
Glede, energi og meistring
Undersøkinga i år viser ei positiv utvikling på fleire område, særleg når det gjeld livskvalitet og psykisk helse. Fleire ungdommar enn tidlegare oppgir at dei er tilfredse med livet, og fleire trur dei vil få eit godt og lykkeleg liv som vaksne.
Fleire enn før trenar jamleg, og deltakinga i organiserte fritidsaktivitetar har auka sidan 2023.
Dei fleste ungdommane beskriv kvardagen som fylt med glede, energi og meistring, og 86 prosent er fornøgde med foreldra sine.
Bruken av e-sigarettar og snus aukar
Undersøkinga viser ein nedgang i bruk av narkotika sidan 2023. Nedgangen gjeld både cannabis og andre narkotiske stoff.
Bruken av snus og e-sigarettar blant ungdommen held likevel fram med å auke mykje. 11 prosent svarer at dei bruker e-sigarettar kvar veke eller dagleg, ein auke frå 7 prosent i 2023 og 1 prosent i 2021. Fleire jenter enn gutar bruker e-sigarettar.
Mobbing – framleis eit problem for fleire
Trass i eit positivt hovudbilete, er det likevel ikkje alle som har det like bra. Tala viser at kvart sjette ungdom sjeldan eller aldri opplever å ha mykje energi, og omtrent like mange oppgir at dei sjeldan eller aldri kjenner seg nyttige.
Undersøkinga viser også at mobbing framleis rammar mange ungdommar, og at omfanget ikkje har gått ned samanlikna med 2023.
7 prosent av gutane og 5 prosent av jentene svarte at dei omtrent kvar 14. dag eller oftare vart utsette for plaging, truslar eller utfrysing frå jamaldrande på skulen eller fritida.
