Vekas viktigaste: Krig i Midtausten og historisk val i Nepal

Trump vil stanse handel med Spania

USAs president Donald Trump truar no med å stoppe all handel med Spania.

Trusselen kjem etter at den spanske regjeringa nekta USA å bruke spanske militærbasar i krigen mot Iran, skriv NRK.

Spanias statsminister Pedro Sánchez har fordømt angrepet på Iran og seier det kan føre til ei meir fiendtleg og usikker verd. Utanriksministeren i landet, José Manuel Albares, har bede om ei varig løysing på konflikten.

Ekspertar meiner det vil bli problematisk for Trump å gjennomføre sanksjonane han trugar med. Som ein del av EU, er Spania beskytta av handelsunionen. Å kutte handel med Spania, utan å ramme andre EU-land, kan vere vanskeleg.

Tidlegare rappar kan bli statsminister i Nepal

Torsdag gjekk nepalarane til valurnene, og røystene blir no talde. 19 millionar menneske registrerte seg til å stemme før valet.

Valet er det fyrste sidan eit Gen Z-leia opprør velta den førre regjeringa i september i fjor. Fleire parti lova i forkant av valet å kjempe for meiningane til yngre nepalarar, takle korrupsjon og få fleire ut i jobb.

Dei fyrste prognosane tyder på at det kan bli partiet til den tidlegare rapparen Balendra Shah som vinn valet.

Balendra Shah har lenge blitt sett på som ein av dei største kandidatane. Som rappar kritiserte han landets elite. I 2022 vann han borgarmeistervalet i Katmandu, hovudstaden i Nepal.

Noreg skal diskutere atomvåpensamarbeid med Frankrike

Frankrikes president Emmanuel Macron varsla måndag at Frankrike vil auke antalet atom­stridshovud i landet. Han grunngav opprustinga med auka geopolitisk uro.

Macron har snakka om fleire europeiske land som skal få delta i franske «avskrekkingsøvingar». Noreg blei ikkje nemnt blant dei landa.

Likevel seier utanriksminister Espen Barth Eide (Ap) at dei blei kontakta av Frankrike dagar før fråsegna til Macron.

– Vi er klare til å diskutere dette i ramma av ei partnarskapsavtale med Frankrike. Men atompolitikken vår ligg fast: Vi skal ikkje ha atomvåpen på norsk jord i fredstid, sa utanriksministeren i Stortinget tysdag.

Høgre-leiar Ine Eriksen Søreide er positiv til eit samarbeid.