Regjeringa vil ha aldersgrense også på Snapchat
Regjeringa ønskjer ikkje noko unntak for Snapchat i den planlagde aldersgrensa for sosiale medium, slår barne- og familieminister Lene Vågslid fast.
– La meg gjere det klart at vi ønskjer ei aldersgrense som skal omfatte tenester som Snapchat, seier Vågslid til Aftenposten.
Då regjeringa lanserte planen sin om 15 års aldersgrense for sosiale medium i sommar, reagerte mange på at det vart foreslått unntak for tenester som Snapchat.
Saka har skapt eit veldig engasjement. Fredag går høyringsfristen for lovforslaget ut, og det har så langt komme over 8000 høyringssvar.
Ifølgje Aftenposten er rundt 3000 av dei tilnærma identiske og kjem frå ulike foreldrenettverk som er motstandarar av sosiale medium for barn. Alle er heilt tydelege på at Snapchat må inkluderast i eit forbod.
Samtidig som ho lukkar døra for Snapchat, understrekar Vågslid at det også er viktig at ei aldersgrense ikkje avgrensar moglegheita barna og unge har til å delta i fritidsaktivitetar og fellesskapar.
– Vi har foreslått unntak for dataspel og tenester som blir brukte til kommunikasjon om skule og fritidsaktivitetar. Lovforslaget må innehalde ein tydeleg definisjon, og derfor kjem vi til å jobbe grundig med å finne ut kvar avgrensinga skal gå, seier ho.
(©NPK)
