Ola Svenneby vil bli nestleiar i Høgre
Svenneby seier han ønskjer fornying, og at han vil jobbe for å treffe breitt.
– Eg vil seie til valkomiteen at eg vil bli vurdert som nestleiar, seier Svenneby til VG.
28-åringen meiner Høgre treng fornying for å tiltrekkje unge veljarar.
– Det skjer noko i norsk politikk i desse dagar som eg trur Høgre kan komme godt ut av. Det er ei rørsle av veljarar – eit generasjonsopprør om du vil – som den førre generasjonen politikarar ikkje klarer å sjå og fange opp, seier Svenneby.
Svenneby åtvarar mot å bli «museumsvaktarar som forsvarar eit system som er i ferd med å endre seg».
Alle dei tre som har meldt seg på i leiarkampen, Henrik Asheim, Peter Frølich og Nikolai Astrup, har peika på at partiet må prioritere ei liberal retning. Svenneby avviser at han i hovudsak skal hente veljarar frå Frp.
– Eg skal hente veljarar, men dei tek feil dei som trur at eg i hovudsak er oppteken av dei som bryr seg om innvandring. Eg skal vise at eg har ei breidde som treffer breie lag av folket, seier han til VG.
