Equinor finansierte dataspel – blir skulda for å drive lobbyverksemd mot barn
Eit dataspel finansiert av Equinor er knytt til ein innsats for å «sikre løyve til å operere», skriv organisasjonen som har kvalitetssikra spelet for britiske skulebarn.
Både E24 , NRK og Finansavisen har omtalt spelet. Det går ut på å bygge ein by med ulike energikjelder, som vind, kol, gass og olje.
Spelet er utvikla av marknadsføringsbyrået We are Futures, ifølge E24. Organisasjonen Association for Science Education (ASE) har kvalitetssikra spelet for britiske skulebarn.
På ASEs nettside står det at spelet er del av eit undervisningsprogram knytt til eit arbeid for å «sikre løyve til å operere i e tid med sensitivitet rundt fossile brensel».
– Særleg i lys av godkjenninga av Rosebank-utbygginga, står det vidare.
Rosebank er eit stort oljefelt utanfor kysten av Shetland der Equinor er majoritetseigar. Equinor-talsmann Magnus Frantzen Eidsvold seier dette om spelet til NRK:
– Vi er opptatte av og ønsker å ha legitimitet for drifta og den rolla vi som selskap speler i ei energiomstilling og energiforsyning. Denne typen aktivitet er eigna til å gi ein sånn legitimitet, basert på faktisk statistikk og reelle data.
Britiske miljøorganisasjonar er sterkt kritiske til Rosebank-utbygginga. Charlotte Howell, leiar for organisasjonen Parents for Future, skuldar Equinor for å drive lobbyverksemd retta direkte mot barn.
Eidsvold seier til E24 at spelet ikkje er del av ein lobbykampanje knytt til Rosebank. Ifølge Eidsvold har Equinor ikkje vore involvert i beskrivinga av spelet på ASEs nettside.
