Vekas viktigaste: Trump-toll, jordskjelv i Myanmar og romferd

Trump-toll på heile verda

Onsdag kunngjorde president Donald Trump at USA legg mellom 10 og 50 prosent toll på varer frå ulike land. Noreg blir pålagt 16 prosent toll, opplyser næringsminister Cecilie Myrseth (Ap) torsdag.

Han innfører 10 prosent toll på nesten all import. EU-tollen blir på 20 prosent. Kina har allereie fått 20 prosent toll frå før og endar med totalt 54 prosent.

Dei nye tollsatsane trer i kraft 5. og 9. april.

EU-kommisjonens leiar Ursula von der Leyen seier dei er klare til å svare USA og at dei er i ferd med å ferdigstille den første pakken med mottiltak.

– Det er det mest alvorlege tilbakeslaget for ein open og fri verdshandel vi har sett sidan mellomkrigstida, seier finansminister Jens Stoltenberg (Ap).

Statsminister Jonas Gahr Støre opplyser at USA har opna for forhandlingar, skriv NRK.

Over 3000 døde i jordskjelv i Myanmar

Fredag førre veke vart Myanmar råka av eit kraftig jordskjelv. Skjelvet som skjedde like utanfor byen Mandalay hadde ein styrke på 7,7, og er det kraftigaste skjelvet i Myanmar på eit hundreår.

Ifølgje den statlege nyheitskanalen MRTV er over 3000 døde som følgje av skjelvet, og meir enn 4600 er skadde, skriv NTB.

Onsdag kunngjorde militærjuntaen som styrer Myanmar ei våpenkvile fram til 22. april. Våpenkvila skal sikre at naudhjelp kjem fram og bidra til oppbyggingsarbeidet. Våpenkvila gjeld mot væpna grupper som motset seg militærjuntaen sitt styre.

Oppdatering: NTB skriv at kampar mellom militærjuntaen og motstandsgrupper heldt fram torsdag trass våpenkvila.

Marine Le Pen dømt for underslag

Måndag vart den franske politikaren Marine Le Pen funne skuldig i å ha misbrukt offentlege midlar. Ho har dei siste vala vore presidentkandidat for ytre høgre-partiet Rassemblement national (Nasjonal samling) i Frankrike. Frå 2011 til 2021 var ho partileiar.

Ho var saman med over 20 andre personar, dei fleste frå partiet hennar, tiltalt for å ha underslått EU-midlar, skriv NRK.

Le Pen blei dømt til fire år i fengsel, der to av dei er på vilkår. I tillegg får ho fem års forbod mot offentlege verv, og kan dimed ikkje stille som kandidat til presidentvalet i 2027.

Le Pen seier ho er uskuldig, og meiner domstolen prøver å hindre ho i å stille i valet. Ho kjem ifølgje advokaten til å anke dommen.

Kina med militærøving utanfor Taiwan

Kina øvde på å angripe Taiwan denne veka. Ifølgje Taiwan var øya omringa av 27 kinesiske fly, 21 krigsskip og ti kystvaktskip, skriv NTB.

Kina skal ha øvd på åtak mot viktige hamner og kraftinfrastruktur. Kinesiske styresmakter melde onsdag at øvinga var over.

Kina meiner Taiwan si regjering sitt ønske om å erklære seg som eit uavhengig land er ein provokasjon. Kinesiske styresmakter meiner Taiwan er deira territorium.

Ifølge det kinesiske militæret var formålet med øvinga å sende ei «streng åtvaring» til separatistar, skriv NTB. Kinas kontor for Taiwan-relaterte saker ville sende ein beskjed til Taiwans president Lai Ching-te, som i mars la fram ein plan for å styrke Taiwans nasjonale sikkerheit.