Programleiaren studerte journalistikk i Volda og blei ven med Simon Nitsche.
– Eg hadde store ambisjonar og drøymde om å bli talkshow-vert.
Det minnest Emil Gukild (32) om kva planar han hadde for livet som 20-åring.
Sjølv om han kanskje ikkje kan skilte med sitt eige talkshow (enda), har det blitt mange tv-innslag på NRK-profilen. Gukild er kjent frå mellom anna NRK Sport, Kjendis-VM, 71 grader nord – team og podkasten Skiklubben. Snart skal han leie sjåarane gjennom ski-VM-sendingane frå Trondheim, og han debuterer som skodespelar i serien Flukten fra Bolivia.
Studerte i Volda
Emil Gukild vart fødd i Texas i USA og vaks opp i Moss. Då han var 20 år, hadde programleiaren flytta til Volda i Møre og Romsdal.
– Eg studerte journalistikk, laga student-TV og prøvde å finne meg sjølv, fortel han i ein e-post til Framtida.no.
– Hugsar du korleis du tenkte om livet og om framtida?
– Vi fekk raskt beskjed om at det var tøft å få seg jobb etter studiet. Eg bestemte meg raskt for å jobbe hardt og gi alt.
Heimlengsel og ny ven
Emil Gukild sakna gamle venar og Moss.
– Eg trur eg prøvde å kvele heimlengselen med Harry Potter og Robbie Williams, svarar han om kva han såg og lytta på som 20-åring.
Foto: Privat
Men i Volda fekk Gukild ein ny ven i Simon Nitsche, som også vart den viktigaste personen for han på den tida.
– Vi blei raskt venar i løpet av det første halvåret i Volda og eg trur ikkje at eg hadde overlevd der utan han.
Dei har begge blitt programleiarar og sportsjournalistar. Simon Nitsche fortalde òg om venskapet med Gukild då han svara i Då eg var 20-spalta til Framtida.no.
– Eg og Emil Gukild heldt på å stryke i eit kommunikasjonsfag. Men vi klarte å redde det inn siste dagen med ein song til læraren. Ganske absurd, umodent og gøy på same tid, kunne Nitsche avsløre.
- Les heile intervjuet her: Då eg var 20: Simon Nitsche såg Obama i levande live
Rompa mi på bursdagen
Emil Gukild hugsar lite av kva som skjedde utanfor Volda i februar 2012, då han fylte år. 20-årsdagen har han derimot klart i minnet.
– Eg hadde besøk av ein venegjeng frå Moss og såg D.D.E. på Studenthuset Rokken. Eg fekk synge Rompa mi med Bjarne Brøndbo oppe på scena. Minne for livet.
– Kva er det sterkaste minnet frå då du var 20?
– Usikkerheita rundt det å ha flytta heimanfrå, ta høgare utdanning og prøve å finne vegen vidare i livet.
Om NRK-profilen hadde møtt seg sjølv som 20-åring, hadde han tenkt at «han der stressar for mykje».
– Slapp av, ta det med ro. Dette ordnar seg, er rådet han ville gitt seg sjølv.
