Her juksar studentane mest

Ved utgangen av 2024 var 365 studentar utestengde frå høgare utdanning.

Det er ein nedgang på 35 prosent frå året før og ei halvering frå 2022.

Det kjem fram i ei sak på nettstaden Khrono, som har sett på tala frå Register for utestengde studentar (Rust). 313 av fjorårets 365 sanksjonar vart gjeve for juks, 23 etter ei skikka-vurdering og sju for bruk av falskt vitnemål eller andre falske dokument.

 Sjå resultata for din utdanningsinstitusjon nedst i saka.

Ser ein bort frå dei minste institusjonane, der små tal gjer store utslag, ligg Universitetet i Søraust-Noreg (USN) framleis på topp, med 44 sanksjonar, sjølv om talet på sanksjonar er halvert.

Handelshøyskolen BI har hatt størst nedgang med 86 prosent det siste året.

Ser ein på kor stor del av studentmassen som vart utestengd ved dei ulike institusjonane, ligg Høgskolen for leiing og teologi på topp, der 2,35 prosent av dei 255 studentane vart utestengde.

I motsett ende av skalaen ligg Handelshøyskolen BI, der 0,04 prosent av dei 21.355 studentane vart utestengde.

Ifølgje Khrono er det klart flest utestengde i dei lågaste aldersgruppene, med 128 i aldersgruppa 19 til 24 år, 87 i aldersgruppa 25 til 29 og 51 mellom 30 og 34 år.