Blir flau av mannsdominerte julehefte: – Ingen mangel på kvinnelege serieskaparar
Tusjkollektivet vil utfordre den norske juletradisjonen.
Berre éin kvinneleg teikneserieskapar var om bord i den såkalla sjokkseljaren i fjor for 30 julehefte. Det vil nokon gjere noko med.
Nærare bestemt Tusjkollektivet med stjernekvartetten Tegnehanne, Nora Dåsnes, Therese G. Eide og Noor H. Eckhoff – og forlaget bak, Strand.
– I alle fall på teikneseriefronten har det vore mannsdominert – ja, ein mannsbastion, seier forlagsredaktøren for juleheftet rett og slett kalla «Tusjkollektivet – julen 2024», Hanne Kristin Wolden.
Forfattar og illustratør Nora Dåsnes saman med nokre av karakterane frå den prisløna grafiske romanen Ubesvart anrop! Foto: Agnete Brun/Aschehoug, illustrasjon Nora Dåsnes
– Litt flaut
Ho fortel at det i 2023 berre var Lise Myhre og hennar «Nemi» som heldt fortet i den ettertrakta sjokkseljaren. I 2024 rykte også Tusjkollektivet inn, ifølgje Wolden «som eit forsøk på å gjere litt med den balansen».
Tusjkollektivet har bytt på å levere heilsider frå dei respektive universa sine til Aftenposten. Då innsåg ein i Strand at dei saman kunne stå for «eit knakande godt julehefte også».
– Så får Bladcentralen og dei andre forlaga også komme på banen, seier Wolden og legg til:
– Det er litt flaut at det ser slik ut, for det er ingen mangel på kvinnelege serieskaparar. På sjølve teikneseriefronten har ein komme lenger. Men når det gjeld jula, heng det framleis etter. No vil vi velte denne mannsbastionen.
Tradisjonelle kjøparar
Ho trur det kan vere ein tung tradisjon å bryne seg på, og trur at også kjøparane er ganske tradisjonelle i vala sine.
– Jul handlar om tradisjon. Men «Nemi» har klart å bli ein juletradisjon. Så håpet er at vi får med desse fire neste år òg, seier Wolden i Strand Forlag og legg til at det er det tradisjonelle teikneserieformatet ved juletider det er snakk om.
Når det gjeld andre julehefte, som dei litterære som har komme til, er balansen betre.
Ho seier at dei fire lagar veldig ulike teikneseriar, både i stil og innhald, men har skildringar av ulike typar kvinneliv som fellesnemnar:
– Det er det ikkje akkurat for mykje av i teikneseriejulehefta.
Foto: Tora Hope/Hanne Sigbjørnsen.
Braut eige løfte
Juleheftet til kvinnekvartetten er teke godt imot. Det synest Tegnehanne er «veldig stas og så klart enormt inspirerande».
– Julehefta er ein veldig sterk tradisjon i Noreg. At nykomlingen vår så raskt kan bli ein kritikarfavoritt, er utruleg gøy, seier serieskaparen med det sivile namnet Hanne Sigbjørnsen i ei fråsegn. Eigentleg hadde ho lova seg sjølv aldri meir å gi ut eit julehefte, etter å ha prøvd seg i 2021.
– Men då det vart snakk om å gjere det saman med tre andre så flinke serieskaparar, måtte eg bryte mitt eige løfte.
