Vekas viktigaste: Streik i Israel, klimasøksmål og gransking av brann

Ytre høgre-parti gjorde brakval i tysk delstat

Sundag 1. september hadde dei tyske delstatane Sachsen og Thüringen lokalval. Partiet Alternativ für Deutschland (AfD) fekk ein tredjedel av seta i parlamentet i Thüringen, og er dermed det største partiet. Dei fekk også over 30 prosent av seta i Sachsen, men der vart dei ikkje det største partiet.

Dette er fyrste gong sidan andre verdskrig har eit ytre høgre-parti vunne eit delstatsval i Tyskland.

AfD er rekna som eit ekstremistisk parti av den tyske etterretningstenesta, og partileiaren i Thüringen, Björn Höcke, er straffedømt for nazistisk retorikk.

Trass i at dei vart det største partiet, får dei ikkje nødvendigvis styre.

– Framleis seier alle dei andre partia at dei ikkje vil samarbeide med AfD. Korkje i lokalpolitikken eller delstatspolitikken, seier kommentator Astrid Sverresdotter Dypvik til VG.

Utan samarbeidsparti klarer dei ikkje å få 50 prosent av lokalparlamentet som dei treng for å styre. Likevel kan dei få stor innverknad på lovane som blir laga, når dei har ein tredel av seta.

Rapport viser at Grenfell-brannen kunne vore hindra

I 2017 brann Grenfell-tårnet i London, og 72 menneske døde. Tårnet var ein bustad for folk med låg inntekt. Årsaka til brannen var blant anna ei svært brennbar kledning på bygget som skulle gjere det meir vasstett.

Denne veka kom rapporten som har granska brannen, og ifølgje BBC er det fleire ting han seier leia til tragedien.

Både private og offentlege aktørar ignorerte eller skjulte kor brennbart kledninga på bygningen var, trass i fleire testar, og også brannar som strekker seg tilbake til 1992. I tillegg førte privatiseringa av The Building Research Establishment (BRE), som skal gi ekspertråd om byggeindustrien til styresmaktene i Storbritannia, til at dei ikkje var så uavhengige som dei burde ha vore. På toppen av dei heile var det fleire kutt i offentlege tenester, som førte til at det naudsynte brannvernet for slike bygg vart nedprioritert i både bygningsarbeid og hjå brannvesenet.

Konklusjonen er at brannen var eit resultat av fleire tiår med feiltak og forsømming frå både styresmakter og private aktørar.

✨Vekas lyspunkt✨: DR Kongo fekk vaksinar mot m-koppar

Torsdag kom dei fyrste vaksinane mot m-koppar til Den demokratiske republikken Kongo. Landet har strevd med utbrotet av sjukdommen som Verdas Helseorganisasjon (WHO) har erklært ei global helsekrise.

Det er EU som har donert dei 99 000 vaksinane som kom til hovudstaden Kinshasa klokka 13 lokal tid. Det skal også kome 200 000 dosar til i helga.

No startar arbeidet med å vaksinere vaksne i dei regionane i landet som er mest ramma av sjukdommen.