Vekas viktigaste: EU-val, PST-aksjon og medaljedryss

FN: Både Israel og palestinske grupper har gjort krigsbrotsverk

Granskingskommisjonen til FN konkluderer med at både Israel og væpna palestinske grupper har gjort seg skuldige i krigsbrotsverk på Gazastripa, skriv NRK.

– Det er avgjerande at alle som har gjort lovbrot, blir stilt til ansvar, sa Navi Pillay, leiar for kommisjonen, då rapportane vart lagt fram onsdag. Rapportane tar for seg hendingane på Gazastripa frå åtaket 7. oktober til utgangen av 2023.

Ifølgje granskingskommisjonen er Israel skuldige i krigsbrotsverk, lovbrot mot menneskeslekta og brot på internasjonal humanitær rett. Dei trekker fram utrydding, drap, kjønnsbasert forfølging, tvangsforflytting og «umenneskeleg tortur», ifølgje NRK. Etter FN-rapporten skuldar Israel kommisjonen for systematisk anti-israelsk diskriminering.

Israel blir òg skulda for å nytte «utsvelting» som våpen, skriv NTB. Torsdag melder Verdas helseorganisasjon (WHO) at over 8000 småbarn er akutt underernærte på Gazastripa.

FN-kommisjonen konkluderer òg med at Hamas og andre palestinske væpna grupper og sivile har brote internasjonal humanitær rett og er skuldige i krigsbrotsverk og lovbrot mot menneskeslekta då dei gjekk til åtak på Israel 7. oktober. Granskarane til FN har ikkje kunna verifisere rapportar om valdtekt, men finn ei rekkje indikasjonar på at det vart brukt seksuell og kjønnsbasert vald. Dei meiner det er særleg grovt at barn blei tekne gissel, og peikar på at israelske barn blei tvinga til å sjå familiemedlemmar bli drepne.

Hamas har så langt ikkje kommentert rapporten, skriv NTB.

PST-aksjon mot barn og unge i høgreekstreme nettforum

Torsdag aksjonerte Politiets tryggingsteneste (PST) mot eit nettverk med unge høgreekstreme over heile landet, skriv NRK. Ungdomane skal mellom anna ha delt grove valdsvideoar og bilete av våpen, og skal ha oppmoda til terror og drap på homofile.

Det er snakk om unge i alderen 12 til midten av 20-åra. Politiet aksjonerte mot 15-20 personar der dei fleste er mellom 12 og 17, opplyser NRK i saka.

– Dei deler også videoar av utført terror. Dei hyllar Anders Behring Breivik og Brenton Tarrant, som drap over 50 personar i ein moské i Christchurch. Det er tidvis ganske grovt, seier leiar for seksjon for kontraterror i PST Bjørn-Willy Wold.

Han forklarar at det ofte startar på opne plattformer, som TikTok, og at dei vidare blir dratt inn i lukka forum.

Aksjonen resulterer i frivillige, førebyggjande samtalar, men Wold er oppteken av at dei unge må forstå alvoret.