Dette engasjerer ungdom i dag

Merjem Duderija (17) engasjerte seg i elevrådet på skulen sin, og vidare i ungdommens fylkesråd i Buskerud.

– Eg er opptatt av elevmedverking. Vi ungdommar skal vere framtida, og viss vi ikkje får plass, korleis skal vi kunne gjere det betre framover?

Det å la ungdom ta plass meiner ho er viktig for framtida deira.

– Særleg når det gjeld arbeid, er det vanskeleg for ungdom å finne plassen sin. Det er ikkje lønsamt å tilsette ein 16-åring om du kan få ein 22-åring med arbeidserfaring.

– Ingen skal bli fødd inn i urettferd.

Jonathan Rygg (14) frå Stavanger fann engasjementet sitt tidleg, under stortingsvalet i 2021. Då venninna melde seg inn i AUF, følgde han etter, og vidare vart det fleire roller i forskjellige råd. For han er det eit viktig poeng at alle skal ha gode moglegheiter.

– Sjølv om du er fødd inn i ein fattigare familie, skal du ha moglegheit til å gå på skule og universitet, og gjere det du har lyst til å gjere.

– For meg som ung i distrikts-Noreg er det ekstra viktig at det går an å bu i heile Noreg.

Heidar Bergum Jahr (18) sitt engasjementet starta då han forstod at ikkje alt var perfekt i lokalsamfunnet. Dersom folk skal kunne bu på bygda, meiner han det må leggjast opp til det.

– Då må ein ha gode vegar, god infrastruktur som gjer at ein kan kome seg ulike stader, og ein må ha gode tilbod i heile distrikts-Noreg.

For David Mousavi (17) er det å bli med i politikken noko av det største som har skjedd han. Å diskutere hjartesaker med andre gir han veldig mykje, og hjartesaker har han nok av:

– Eg skal ikkje ramse opp heile lista, men på eit internasjonalt spekter er det hundre prosent Palestina-Israel-konflikten, og Ukraina og Russland.

På eit meir nasjonalt nivå er han oppteken av kampen mot diskriminering, samhald og kultur, og at Noreg klarer å oppretthalde dei verdiane vi har.

– At vi kan forme framtida på ein god måte.

– Eg såg problemstillingar som for eksempel ungdomskriminalitet, som var i mitt nærmiljø, som eg ville endre.

Framtida.no pratar med Rawan Naima (14) like før ein panelsamtale om korleis vi skal ta vare på jorda i åra framover. Ho bryr seg nemleg om fleire ting enn ungdomskriminalitet.

– No er eg oppteken av klima, som vi skal prate om. Og så er eg oppteken av internasjonale samarbeid mellom Noreg og andre, og at vi unge blir lytta til i forskjellige saker.

Nahom Guitom (14) ville vere ei stemme for ungdom lik han sjølv. Sjølv om han er fødd i Noreg, har han foreldre som er innvandrarar, og det var viktig for han å hjelpe dei som ikkje følte seg heilt norske, men heller ikkje berre som innvandrarar.

– No i dag er eg meir oppteken av å gi ungdom ei stemme, og kva vi kan gjere for at ungdom skal ha det best.

I det siste har han særleg jobba med forslag til ei samtykkelov, og korleis dei som er dømt for valdtekt, blir straffa.

– Eg var i Oslo nyleg for å sende inn forslag.

– Mitt engasjement kom frå heimen, der det var spørsmål om eg ville bli med i eit ungdomsråd.

Iver Aarebrot har erfart at politikk kan fungere, og meiner det er slik ein skaper endring i verda. No er han oppteken av å byggje gode band nasjonalt og internasjonalt.

– Å forme venskap og samhald og gode relasjonar til kvarandre, sånn at vi skapar innovasjon og nye tankar og løysingar inn i framtida er det som driv meg no.