Vekas viktigaste: Flyktningvedtak i Drammen, indonesisk val og likekjønna ekteskap i Hellas

Drammen kommune vil berre ta imot ukrainske flyktningar

Det borgarlege fleirtalet i Drammen kommunestyre gjekk tysdag inn for å berre ta imot ukrainske flyktningar.

Sidan då har senterpartipolitikar Simon Nordanger meldt kommunen til politiet, og Jonas Gahr Støre, Erna Solberg og Tonje Brenna har fordømt vedtaket. Dei meiner kommunar ikkje sjølv kan bestemme kva bakgrunn flyktningane dei tek imot har, og at det er ulovleg diskriminering. Støre presiserte seinare at det er opp til statsforvaltaren å vurdere om vedtaket er lovleg.

Kommunen vart originalt bede om å ta imot 350 flyktningar av Integrerings- og mangfaldsdirektoratet, men kommunedirektøren tilrådde 250. Den politiske leiinga nedjusterte talet til 125, og meiner kommunen allereie har teke imot mange flyktningar, som har ført til problem med integrering. Av dei 104 000 menneska som bur i kommunen, er 25 prosent frå eit anna land enn Noreg.

Jon Helgheim i Buskerud Frp er ein av politikarane bak vedtaket, og grunngjev endringa med at ukrainske flyktningar er enklare å integrere enn ikkje-vestlege innvandrarar.

Val i Indonesia

Indonesiarar stemte denne veka over kven som skal leie landet deira dei neste fem åra. Med over 200 millionar med stemmerett i det tredje største demokratiet i verda, tek det tid før alle stemmene er talde opp. Ei uoffisiell førebels oppteljing som er gjort med eit utval stemmer viser at den 72 år gamle forsvarsministeren Prabowo Subianto har fått 57 til 59 prosent av stemmene. Ved dei tidlegare vala i Indonesia har desse oppteljingane vore ein god indikasjon på resultatet. For å bli president i Indonesia må ein ha over 50 prosent av stemmene.

På 90-talet var Subianto general i ein del av militæret som vart knytt til forsvinningar og tortur, særleg i då okkuperte Aust-Timor. Han har nekta for desse skuldingane.

No har den tidlegare generalen erklært siger, men dei to motstandarane har ikkje vedgått tap. Det kan ta fleire månader før det offisielle resultatet er klart.

Masseskyting ved Super Bowl-feiring

Ein person er død og over 20 skada etter skyting ein parade i Kansas City i USA. Paraden var ei feiring av det amerikanske fotballaget Kansas City Chiefs, som hadde vunne Super Bowl.

Rundt ein million menneske skal ha vore samla for feiringa, og det skal ha vore barn blant dei skadde etter skytinga.

President Joe Biden har uttrykt sympati med dei ramma, og brukte høvet til å argumentere for strengare våpenlover.

Økokrim ber om over 3 år fengsel for Anders Besseberg

Denne veka vart rettssaka mot den tidlegare presidenten i Det internasjonale skiskyttarforbundet (IBU), Anders Besseberg, avslutta. Økokrim bad Buskerud tingrett om at han blir dømt til 3 år og sju månader fengsel, og ei bot på éin million kroner.

Besseberg er skulda for å ha teke imot bestikkingar, i form av dyre klokker, prostituerte og jaktturar. Den offisielle tiltala er for grov korrupsjon medan han var president i IBU. Han nektar for desse skuldingane.

Rettssaka har føregått sidan 9. januar. Dommen i saka vil etter planen bli lesen opp i Buskerud tingrett 12. april, skriv NRK.

Likekjønna ekteskap blir lovleg i Hellas

Torsdag 15. februar stemte fleirtalet i den greske nasjonalforsamlinga for å legalisere likekjønna ekteskap. Hellas er det fyrste ortodokse kristne landet som gjer dette.

Av dei 300 representantane i parlamentet stemte 176 for forslaget, og 76 stemte mot. Resten avstod frå å stemme. I tillegg til ekteskap, gjer lova det enklare for likekjønna foreldre å adoptere barn.

Hellas har hatt likekjønna partnarskap sidan 2015.