Vekas viktigaste: Vindrekord, ungdomskriminalitet og bondeopprør

Ungarn vart pressa til å gå med på krisepakke til Ukraina

Torsdag 1. februar var det toppmøte i EU. Der sa den ungarske statsministeren Viktor Orbán ja til ei militær pakke til Ukraina på 50 milliardar euro. EU skal fordele pengane over dei neste fire åra.

Ungarn var det einaste landet som stod i vegen for denne pakka, og blokkerte vedtaket før jul.

Etter eit EU-notat som stod fram som ein plan for å sabotere ungarsk økonomi vart lekt, skulda Orbán EU for utpressing. Notatet viste seg seinare å vere ei skildring av ungarsk økonomi, men Viktor Orbán har likevel gått ut og sagt at det faktisk eksisterer ein plan for å sabotere økonomien for landet hans.

«Ingunn» sette vindrekord

Det har storma langs heile norskekysten denne veka, spesielt i Nordland. Stormen «Ingunn» har ført til at skular har blitt stengde, tak har blitt teke av vinden og trafikken på vegar og jernbaner har blitt stoppa.

I Harstad måtte sjukehuset gå over til raud beredskap, og i Bodø stengde politiet sentrum på grunn av fare for liv og helse.

I Sømna kommune vart det sett ny vindrekord i Noreg, med vindkast opp til 54,4 meter på sekund. Over 32 meter per sekund blir definert som ein orkan.

Meteorologar har samanlikna stormen med nyttårsorkanen som sette rekord i 1992.

Store bondeopprør i Europa

Dei siste vekene har franske bønder demonstrert, og denne veka rykte dei med traktorar inn for å blokkere hovudstaden Paris.

Hovudstaden sende ut 15 000 politifolk i gatene for å forsøke å hindre at byen vart lamma. Demonstrasjonen er ein del av eit større bondeopprør i fleire EU-land, inkludert Frankrike, Belgia og Tyskland. Bøndene protesterer mot det dei meiner er urettferdige konkurransevilkår og redusert inntekt og pensjon.

Ifølgje Bama er 100 av deira bilar påverka, som kan føre til at mindre frukt og grønt blir frakta til Noreg.

Stor auke i ungdomskriminalitet i Noreg

I 2023 vart det registrert 28 prosent fleire saker med ein gjerningsperson under 18 år, samanlikna med året før. Det går politiet ut med i ei pressemelding denne veka.

Barn under 15 år stod for 36 prosent av forholda.

Politidirektør Benedicte Bjørnland er uroa over utviklinga.

− Politiet ser med bekymring på at det vert utført meir kriminalitet blant stadig yngre born. Sjølv om den største auken består av mindre alvorlege forhold, er det fleire utviklingstrekk som peikar på utfordringar samfunnet må ta grep om i fellesskap, seier ho i pressemeldinga.

✨Lyspunkt✨: Samla inn nesten éin million kroner til hjelpearbeid i Gaza på Instagram

Etter krigen braut ut i Midtausten, starta Plan ein innsamlingsaksjon for livreddande nødhjelp til barna i Gaza på Instagram. Originalt var målet deira å samle inn 50 000 kroner via det sosiale mediet, i tillegg til andre inntekter.

No har dei samla inn over 900 000 kroner via Instagram.

Plan samarbeider med Raude halvmåne i Egypt for å levere livreddande fyrstehjelpsutstyr, vatn og mat til Gaza.