Skulane kan bli mobilfrie allereie over nyttår
Allereie om to–tre månader kan dei norske skulane vere mobilfrie, opplyser kunnskapsminister Kari Nessa Nordtun (Ap) til NRK.
![](https://framtida.no/wp-content/uploads/2023/11/NPK-160x160.png)
Fredag skreiv Dagbladet at Nordtun har gitt Utdanningsdirektoratet i oppdrag å utvikle ei tydeleg tilråding til norske skular for å unngå mobilbruk.
I første omgang er det ikkje snakk om eit forbod.
– Det vil ta for lang tid å få på plass eit forbod. Å gi ei tydeleg tilråding kan gjerast langt raskare. Inntil to–tre månader er målet, seier ho til NRK.
![](https://framtida.no/wp-content/uploads/2023/11/NTB_CgJ0ZOB1eNc.jpg)
Kari Nessa Nordtun peikar på at mobilen påverkar dei faglege resultats negativt og fører til utanforskap og mobbing. Foto: Emilie Holtet / NTB / NPK
Den ferske kunnskapsministeren peikar på at mobilen påverkar dei faglege resultata negativt og fører til utanforskap og mobbing.
– Målet er at vi får bukt med dette og ser på restriksjonar knytt til mobilbruken i skulekvardagen, seier ho.
Det er i dag opp til kvar enkelt kommune og skule å avgjere om dei ønskjer å regulere mobilbruken for elevane sine og korleis det i praksis skal gjennomførast. Mange kommunar har allereie ei form for regulering, men det er stor variasjon i korleis dette blir gjort.