Leiar av kontrollkomiteen: Habilitetssaka neppe ferdig i år
Behandlinga av den omfattande habilitetssaka blir truleg først ferdig over nyttår, varslar kontrollkomiteens leiar, Peter Frølich.
Denne artikkelen er eldre enn 1 år gamal. Det betyr at noko av informasjonen kan vere utdatert.
Behandlinga av den omfattande habilitetssaka i kontrollkomiteen på Stortinget blir truleg først ferdig over nyttår, varslar komitéleiar Peter Frølich.
Tysdag denne veka blir det truleg vedteke at den opne høyringa om habilitetssakene i Stortingets kontroll- og konstitusjonskomiteen skal haldast 7. november. Komitéleiar Peter Frølich (H) trur dei skal klare seg med éin dag for å gjennomføre sjølve høyringa, men ho blir lang, skriv Altinget.
Konklusjonen i det omfattande sakskomplekset kjem neppe før på nyåret.
– Det vil ta tid å skrive utkast og ferdig konklusjon. Eg trur ikkje det blir landa før over nyttår, seier Frølich.
Blant sakene komiteen har på bordet i samband med undersøkingane av om habilitetsregelverket for regjeringsmedlemmer er broten, er sakene til utanriksminister Anniken Huitfeldt (Ap) og tidlegare statsminister Erna Solberg (H). Aksjehandlane til ektemennene deira kan ha gjort dei inhabile i fleire saker.
