Kan måtte endre pommes frites på grunn av tørke
Færre og mindre poteter kan føre til kortare pommes frites.
![](https://framtida.no/wp-content/uploads/2021/01/Birgitte-byline-160x160.jpg)
![info](https://framtida.no/wp-content/themes/framtida/images/info.png)
Denne artikkelen er eldre enn 1 år gamal. Det betyr at noko av informasjonen kan vere utdatert.
Har du nokon gong tenkt over at det finst reglar for korleis pommes frites skal vere?
I Frankrike og Belgia, pommes frites si vogge, er det normalt eit krav om at dei populære potetstengene skal vere mellom 8 og 10 centimeter lange.
Dette kravet kan no bli endra, skriv NRK.
Tørkesommar
Årets sommar er den varmaste sommaren som er registrert i Europa, skriv Copernicus. Førre rekord var i 2021, men temperaturen i sommar var i snitt 0,4 grader over dette.
Landbruksnasjonen Frankrike er inne i si fjerde hetebølgje for året.
Avlingane er, som ein konsekvens, dårlegare enn normalt. Ikkje berre fører det til auka matprisar, pommes frites kan òg bli kortare og tynnare.
![](https://media.giphy.com/media/0r3RvW5jN4WobV816C/giphy.gif)
Unionen av franske potetbønder (UNPT) førebur seg på at årets avlingar vil bli 20 prosent mindre enn gjennomsnittet, og i Belgia reknar ein at avlingane blir heile 30 prosent mindre, melder Euractiv.
Det blir både færre poteter, og dei som kjem, er mindre enn vanleg.
Vil truleg ikkje merke det i Noreg
DinSide skriv at ein vil få svar på kva konsekvensar tørken får for pommes frites-standarden etter avlingane i september/oktober. Kjedene McCain og McDonald’s har førebels ikkje kommentert saka.
Sjefen for Burger King i Noreg, Olav Bæverfjord, fortel til DinSide at dei nyttar norske poteter, og difor ikkje blir påverka i særleg grad av leveringsutfordringar med poteter frå Europa.
– I Burger King har vi ikkje planar om å endre utsjånad eller storleik på våre pommes frites.