Ukrainske Iryna tok over David Beckham sin Instagram

David Beckham har nesten 72 millionar følgjarar på Instagram. Søndag fekk desse eit innblikk i ein annan kvardag enn den heime hos familien Beckham.

I eit døgn følgde følgjarane heller den ukrainske legen Iryna, som er sjef for det regionale nyføddsjukehuset i Kharkiv.

I staden for bilete av matlaging, familieidyll og ferieturar, så fekk følgjarane sjå evakuerte mødrer ta seg av sine nyfødde barn i ein sjukehuskjellar. 

– Doktorane og sjukepleiarane her, vi uroar oss, vi gret, men ingen av oss gjev opp, fortalde Iryna.

Ho er på jobb døgnet rundt for å sikre at barna som vert fødde i krigen får ein så trygg start på livet som mogeleg.

Det var Dagsavisen som først omtalte saka i Noreg.

– Dei første dagane var dei vanskelegaste

Kharkiv er den nest største byen i Ukraina, og ligg nordaust i landet, nær den russiske grensa. Byen har vore under kontinuerleg åtak sidan den russiske invasjonen for nesten ein månad sidan.

– Dei første dagane var dei vanskelegaste. Vi måtte lære oss korleis vi skulle arbeide med bombing og åtak, fortalde Iryna på Instagram.

Al Jazeera-korrespondent Assed Baig skildrar situasjonen i Kharkiv som apokalyptisk, og syner fram skadane byen har lidd med bomba bygningar og ruinar på alle kantar.

Hjelper nyfødde å overleve

David Beckham har vore Unicef-ambassadør sidan 2015, og Instagram-overrekkinga skjer i samarbeid med organisasjonen.

Unicef sender mellom anna medisinsk utstyr til Ukraina, og har sikra oksygengeneratorar til sjukehuset i Karkiv.

– Takka vere dykkar bidrag, så kan oksygengeneratorane dei har motteke hjelpe nyfødde med å overleve under forferdelege omstende, sa Beckham på Instagram, og oppmoda fleire til å støtte Unicef og andre organisasjonar.

• Les også: Ljuba (22) sat seks dagar i fengsel for å demonstrere mot Ukraina-krigen: – Russarar held fram med å kjempe mot Putin sitt regime og krigen hans, fortel ho

Ljuba Samylova (22) vart arrestert for å demonstrere mot krigen i Ukraina. Foto: Privat