Fem månader etter at ho flaug av garde i august 2021, har Zara Rutherford greidd målet sitt.
mm
Marte Husabø

I september skreiv me om tenåringen Zara Rutherford som ville bli den yngste kvinna som nokon gong har floge rundt jorda åleine.

No kan ho stryka målet av lista – for ho greidde det!

Torsdag denne veka var 19-åringen tilbake i Belgia med det spesiallaga flyet sitt, Shark, som er ultralett, skriv BBC, som først omtalte saka.

Det er 155 dagar etter at ho tok til på den strabasiøse ferda i august 2021, og i løpet av desse dagane har ho besøkt nesten 50 land, som inkluderer USA, Grønland, Russland og Sør-Korea.

 

View this post on Instagram

 

A post shared by Zara Rutherford (@fly.zolo)

Hatt ein draum

– Dette er berre veldig sprøtt, eg har ikkje tatt det heilt innover meg enno. Eg gler meg til å fortelja folk om erfaringane mine og oppmuntra dei til å gjera noko sprøtt med livet sitt, sa Zara då ho landa og innsåg at rekorden var hennar, ifølgje BBC.

19-åringen kjem frå ein familie full av pilotar, og vart nok påverka av det då ho byrja med flyging i ein alder av 14 år. I 2020 tok ho flygarsertifikatet.

– Eg har heile livet hatt ein draum om å flyga eit fly rundt jorda. Men eg trudde det berre var ein galen idé, og eg har nok alltid trudd at det ville vera umogleg å få til, seier ho ifølgje den britiske kringkastaren.

 

View this post on Instagram

 

A post shared by Zara Rutherford (@fly.zolo)

Vil inspirera andre jenter og kvinner

Nettopp dette gjer nok kjensla av å ha fått det til ekstra deilig. No håpar den unge flygaren at bragda hennar vil inspirera andre jenter og kvinner til å studera realfag.

– Då eg vaks opp, var det ikkje mange kvinnelege pilotar og dataforskarar å sjå opp til. Dette er to av lidenskapane mine. Derfor ville eg flyga rundt jorda, og forhåpentlegvis få andre jenter til å sjå på meg, og få dei til å tenkja at «Hei – eg vil gjerne gjera det same ein dag!».

Rutherford vil no finna seg sjølv i Guinness verdsrekordbok etter å ha tatt rekorden frå den  gamle amerikanske flygaren Shaesta Waiz, som var 30 år då ho gjennomførte sin flytur.

Den yngste mannen til å ha floge verda rundt åleine heiter Travis Ludlow. Han var berre 18 år og 150 dagar då han gjennomførte bragda i fjor sommar!


TALENT: Mali er spiss på J15-laget og har opplevd ulik behandling på fotballbana så mange gongar at ho før jul valde å senda eit brev til Sunnmøre Fotballkrets for å gje beskjed. Foto: Privat

LES OGSÅ

ANNONSE