– «Oi! Korleis hamna eg her, liksom. Dette er heilt surrealistisk.»
Dette var nokre av tankane som gjekk gjennom hovudet til Ragne Wiklund (20), då ho nyleg gjekk inn til eit sensasjonelt VM-gull i skeiser. No har ho hatt tid til å bearbeida kva ho har vore med på.
– No i helga gjekk eg NM, og fekk stå på pallen der også. Sidan eg følte at eg ikkje fekk nyta VM-gullet skikkeleg då det skjedde, fekk eg feira begge deler no.
Men det er ikkje berre skeiser 20-åringen er god på. Ho satsar også aktivt på orientering, og har mellom anna ein bronsemedalje i stafett frå junior-VM i 2018.
– OL har alltid vore ein stor draum. Men eg er ein type som ikkje set meg resultatmål, men heller tidsbaserte mål. Eg likar å forhalda meg til det eg kan gjera noko med, seier Ragne. Foto: Rafal Oleksiewicz
Vanskeleg å velja
– Mamma og pappa har drive med orientering, så det var naturleg at eg starta med det. I tillegg til det har eg også drive med fotball og ski.
Det gjorde det vanskeleg å velja.
– Då eg dreiv på med alle desse idrettane på barneskulen, hugsar eg at eg tenkte at «korleis skal eg greia å velja ein?», seier Ragne.
Valet fall på å halda fram med alle idrettane som var kjekke.
– Eg hugsar at mange tok val om å berre halda fram med ein idrett. Då er det lett å føla at du også må det. Men eg valde berre å ikkje velja, og så gjekk det seg til av seg sjølv.
Ragne med VM-gullet rundt halsen. Foto: Rafal Oleksiewicz
– Eg er vand til å gjera ulike ting
– Eg trur bakgrunnen frå fleire idrettar er grunnen til at eg tek ting så raskt. Eg er vand til å gjera ulike ting, og så har eg eit grunnlag som gjer at eg har mindre sjanse for å bli skadd.
Ho fortel at ho ikkje har planar om å endra sukesshistoria si.
– Eg tenkjer at det fungerer fint å fortsette slik, fordi det gir resultat. Eg hadde to sesongar der eg ikkje sprang så mykje. Det var dårlege sesongar på skeiser, så då fann eg ut at eg måtte springa meir, og etterpå har det jo gitt resultat på skøytebana, seier ho og ler.
Framover har Ragne eit stort mål i sikte.
– OL har alltid vore ein draum. Det er sunt å ha mål å tenkja på når du har harde dagar.
Emilie Kruse Johansen (20) meiner løn og speletider er viktigare enn regelverket under kamp, for å sikra likestilling i idretten. Foto: Fredrik Hagen, Norges Ishockeyforbund.
